পৰিয়ালসহ ব্ৰিটিছ সেনাধিনায়ক নিকোলাচ পেট্ৰিক কাৰ্টাৰৰ কাজিৰঙা ভ্ৰমণ

আজি পুৱাই অসম গৌৰৱ কাজিৰঙা ৰাষ্ট্ৰীয় অভয়াৰণ্যই পালে এজন বিশেষ অতিথি। ৰাষ্ট্ৰীয় অভয়াৰণ্যখনৰ বিশ্বখ্যাতিক অধিক উজলাই তুলি আজি পুৱাই ভ্ৰমণ কৰিলে ব্ৰিটিছ সেনাধিনায়ক চীফ অব দা ষ্টাফ চাৰ নিকোলাচ পেট্ৰিক কাৰ্টাৰে।

তেওঁৰ লগত আছে তেওঁৰ পত্নী লুই এনী (Louise Anne Ewart) আৰু পুত্ৰ-কন্যা। ব্যক্তিগত ভ্ৰমণ সূচী লৈ আজি পৰিয়ালৰ সদস্যসহ কাজিৰঙাত উপস্থিত হৈছেহি বিশ্বৰ ভিতৰতে অন্যতম শক্তিশালী তথা বিশ্বৰ সামৰিক ইতিহাসত নিজৰ শৌৰ্য্য-বীৰ্য্যৰে জিলিকি থকা ব্ৰিটিছ সেনা বাহিনীটোৰ অধিনায়কজন। আজি বিশ্বখ্যাত কাজিৰঙায়ো স্বাভাৱিকতে গৌৰৱিত হোৱাৰ সুযোগ পালে এই বিশ্বখ্যাত সেনা বাহিনীৰ প্ৰধানজনৰ ভ্ৰমণত।

জানিব পৰামতে আজি সেনাধিনায়কজনৰ পৰিয়ালটোৱে হাতীৰ পিঠিত উঠি কাজিৰঙাৰ বাগৰি বনাঞ্চল ভ্ৰমণ কৰে৷

তেজপুৰস্থিত ভাৰতীয় সেনাৰ আতিথ্য গ্ৰহণ কৰি আজি পুৱাই তেওঁ সপৰিয়ালে হাতীৰে কাজিৰঙা দৰ্শন কৰে৷ ৰাষ্ট্ৰীয় উদ্যানখন ভ্ৰমণ কৰি সুখী আৰু ৰোমাঞ্চিত হৈ পৰা বুলি জানিব পৰা গৈছে৷

উল্লেখযোগ্য যে ব্ৰিটিছ সেনাপ্ৰধানজনক ভাৰতীয় সেনা বিষয়া আৰু ব্ৰিটিছ হাই কমিশ্যনাৰৰ বিষয়াই সংগ দিয়ে বুলি জানিব পৰা গৈছে।