ফ্ৰান্সৰ পৰা অসমীয়াক নাগৰিকত্ব বিধেয়কৰ বিৰুদ্ধে মাৰবান্ধি থিয় হ’বলৈ আহ্বান জাহ্নু বৰুৱাৰ
‘কেনেবাকৈ যদি কেন্দ্ৰীয় চৰকাৰে বিচৰামতে নাগৰিকত্ব বিলখন সংশোধন হ’বলৈ হয়, অসমীয়া জাতি আৰু অসমীয়াৰ অস্তিত্ব এই পৃথিৱীৰ পৰা নিঃশেষ হোৱাটো এইটোৱে হ’ব আৰম্ভণি।’-সুদুৰ ফ্ৰান্সৰ পৰা এই বুলি কলে ৰাজ্যৰ প্ৰসিদ্ধ চলচ্চিত্ৰ পৰিচালক জাহ্নু বৰুৱাই।
নাগৰিকত্ব সংশোধনী বিধেয়কৰ বিৰুদ্ধে ৰাজ্যৰ সৰ্বত্ৰ অব্যাহত থকা তীব্ৰ প্ৰতিবাদৰ মাজতে বিশ্বপ্ৰসিদ্ধ কাঁ চলচ্চিত্ৰ মহোৎসৱত অংশগ্রহণৰ উদ্দেশ্যে বৰ্তমান ফ্ৰান্সত থকা বৰুৱাই অসমৰ সংবাদ মাধ্যমলৈ প্ৰেৰণ কৰা এক বাৰ্তাত বিধেয়কখনৰ ঘোৰ বিৰোধিতা কৰে।
প্রতিজন অসমীয়াকে উক্ত বিধেয়কখনৰ বিৰুদ্ধে প্ৰতিবাদ কৰিবলৈ আহিবলৈ আহ্বান জনাই তেওঁ কয় যে ইয়াৰ অন্যথা বিধেয়কখন আইনত পৰিণত হ’লে অহা ৫০ বছৰত অসমীয়াৰ অস্তিত্ব নোহোৱা হ’ব৷
উল্লেখযোগ্য অসমীয়া মানুহৰ অস্তিত্ব প্ৰতি ভাবুকিস্বৰুপ এই বিধেয়কখনৰ বিৰোধিতা কৰি ৭ মে’ত গুৱাহাটীত অনুষ্ঠিত শুনানিত হাজাৰ-হাজাৰ লোকৰ লগতে শিল্পীসমাজৰো বহুকেইগৰাকী লোকে আহি সাক্ষ্য দিছিল।
তদুপৰি জুবিন গার্গ, কল্পনা পাটোৱাৰী, বাবুকে ধৰি শুনানিত উপস্থিত থাকিব নোৱৰা বহু শিল্পীয়েও ইয়াৰ বিৰুদ্ধে জোৰদাৰ প্ৰতিবাদ কৰিছে।