ৰাজ্যৰ বিভিন্ন স্থানত চোৰাংকাঠ বেপাৰীৰ দপদপনি অব্যাহত থকাৰ সময়তে বৃহস্পতিবাৰে নিশা কাজিৰঙা ৰাষ্ট্ৰীয় উদ্যানৰ বনকৰ্মীৰ তৎপৰতাত বনবিভাগে বুঢ়া পাহাৰ নহৰুবস্তিত এখন চোৰাংকাঠভৰ্তি গাড়ী জব্দ কৰে।
প্ৰাপ্ত তথ্য অনুসৰি, কাৰ্বি আংলঙৰ পৰা কাজিৰঙাৰ ৩৭ নং ৰাষ্ট্ৰীয় পথেৰে নগাঁও দিশে আহি থকা অৱস্থাতে নহৰুবস্তিত সন্ধিয়া প্ৰায় ৬:৩০ বজাত চোৰাং কাঠ কঢ়িয়াই অনা এ এচ ০২ এ চি – ৮১২৯ নম্বৰৰ টাটা ডি আই বাহনখন কাজিৰঙাৰ বুঢ়া পাহাৰ বন খণ্ডৰ বনকৰ্মীয়ে জব্দ কৰিবলৈ সক্ষম হয়।
অৱশ্যে নিশাৰ সুযোগ বুজি বনকৰ্মীৰ চকুত ধূলি দি বাহনখনৰ চালককে ধৰি চোৰাংকাঠ সৰবৰাহকাৰী দুষ্ট চক্ৰটোৱে ঘটনাস্থলীৰ পৰা পলাই পলায়ন কৰে।
আনহাতে বনবিভাগে কাঠভৰ্তি বাহনখন জব্দ কৰি বিভাগীয় তদন্ত অব্যাহত ৰাখিছে বুলি জানিবলৈ দিয়ে।
এচাম দুষ্টচক্ৰই নিতৌ কলিয়াবৰকে আদি কৰি কাজিৰঙা ৰাষ্ট্ৰীয় উদ্যানৰ বিভিন্ন প্ৰান্তৰ পাহাৰৰ গছ কাটি তহিলং কৰাৰ সময়তে বনবিভাগৰ এই সফলতাক অঞ্চলটোৰ সচেতন মহলে শলাগ লৈছে।
