বাংলাদেশৰ বিশিষ্ট ধৰ্মনিৰপেক্ষ লিখক তথা শ্বাহজালাল বিজ্ঞান আৰু প্ৰযুক্তিবিদ্যা বিশ্ববিদ্যালয়ৰ অধ্যাপক ড০ জাফৰ ইকবালক শনিবাৰে চিলেটৰ বিশ্ববিদ্যালয়ৰ এক অনুষ্ঠানত অংশগ্ৰহণ কৰাৰ সময়ত আক্ৰমণ কৰি মূৰত আঘাত কৰে।
তেওঁক আক্ৰমণৰ পিছতে ততাতয়াকৈ এখন স্থানীয় চিকিৎসালয়লত ভৰ্তি কৰোৱা হয়। তেওঁক চোৱাচিতা কৰি থকা চিকিৎসকে জানিবলৈ দিছে যে ড০ ইকবাল সম্প্ৰতি বিপদমুক্ত। তেওঁৰ আঘাতত চিকিৎসকলে মুঠতে ২৫ টা চিলাই লগাব লগীয়া হৈছে।
অৱশ্যে, তেওঁক পিছত বাংলাদেশৰ প্ৰধানমন্ত্ৰী শ্বেখ হাছিনাৰ নিৰ্দেশ অনুসৰি ঢাকাত থকা সংযুক্ত সামৰিক হাস্পাতললৈ প্ৰেৰণ কৰা হৈছে।
প্ৰধানমন্ত্ৰী শ্বেখ হাছিনায়ো এনে ঘৃণনীয় আক্ৰমণক তীব্ৰ গৰিহনা দিছে আৰু আক্ৰমণকাৰীক আইনৰ আওতালৈ আনিবলৈ সংশ্লিষ্ট কৰ্তৃপক্ষক নিৰ্দেশ দিছে।
‘’তেওঁক মূৰৰ পিছফালে আঘাত কৰা হৈছিল আৰু ধাৰাসাৰ তেজ বৈছিল,’’-আৰক্ষীৰ উদ্ধৃতিৰে এই কথা প্ৰকাশ কৰিছে স্থানীয় বাতৰি সংস্থাই।
৬৫ বছৰীয়া ব্যক্তিগৰাকীক বিশ্ববিদ্যালয়খনে আয়োজন কৰা এক বিজ্ঞান উৎসৱত মঞ্চত ভাষণ দিবলৈ উঠোতেই ওচৰৰ পৰা আক্ৰমণ কৰিছিল।
অতি সুপৰিচিত আৰু কল্প বিজ্ঞানৰ লিখক গৰাকীক দেশখনৰ মৌলবাদী গোটসমূহে মৃত্যুৰ ভাবুকি দি আহিছিল।
বিগত দুবছৰ ধৰি ড০ ইকবালক আৰক্ষীৰ নিৰাপত্তা প্ৰদান কৰি অহা হৈছিল আৰু বাতৰি মতে কমেও তিনিজন আৰক্ষীৰ লোক মঞ্চত তেওঁ বহি থকা আসনৰ ওচৰতে থিয় হৈ আছিল। শনিবাৰে সন্ধিয়া ৫-৫০ বজাত ঘটনাটো সংঘটিত হয়।
অনুষ্ঠানত উপস্থিত থকা ছাত্ৰসকলে আক্ৰমণকাৰীক ঘটনাস্থলীতে বেয়াকৈ প্ৰহাৰ কৰি তাত উপস্থিত থকা আৰক্ষীক গতাই দিয়ে।
বাতৰি অনুসৰি আক্ৰমণকাৰীৰ সৈতে অহা এগৰাকী সহযোগী কাৰ্যসূচী চলি থকা অনুষ্ঠানৰ বাহিৰত মটৰ চাইকেল লৈ অপেক্ষা কৰি আছিল। আক্ৰমণৰ ঘটনাটো সংঘটিত হোৱাৰ পিছতেই সি পলাই যায়।
অধ্যাপক ইকবালক আক্ৰমণৰ ঘটনাটোৰ পিছতে বিশ্ববিদ্যালয়খনৰ ছাত্ৰ-ছাত্ৰীসকলে স্বত:স্ফুতভাৱে আক্ৰমণৰ ঘটনাটোৰ বিৰুদ্ধে প্ৰতিবাদ কৰে।
