ত্ৰিপুৰাত বাওঁমৰ্চাই গোটেই ৬০ খন আসন পালেও আচৰিত হ’ব লগীয়া একো নাই। ত্ৰিপুৰাৰ ৪৫ কমলপুৰ সমষ্টিত এখন নিৰ্বাচনী প্ৰচাৰ সভাত অংশগ্ৰহণ কৰি এই মন্তব্য কৰিছে চি পি আই (এম) পলিটব্যুৰোৰ সদস্য তথা পশ্চিম বংগৰ ৰাজ্যিক সচিব সূৰ্য্যকান্ত মিশ্ৰই। সভাখনত তেওঁ দাবী কৰে যে আগন্তুক অষ্টম ত্ৰিপুৰা বিধানসভা নিৰ্বাচনত বাওঁ মৰ্চাই পুনৰ শাসনলৈ ঘূৰি আহিব।
উল্লেখযোগ্য যে অহা ১৮ ফেব্ৰুৱাৰিত ত্ৰিপুৰাত নিৰ্বাচন অনুষ্ঠিত হ’ব। ইয়াৰ ফলাফল ঘোষিত হ’ব ৩ মাৰ্চত।
আজি ৪৫ কমলপুৰ সমষ্টিত প্ৰাৰ্থী বিজয়লক্ষ্মী সিনহাৰ হৈ নিৰ্বাচনী প্ৰচাৰ চলাইছিল সূৰ্য্যকান্ত মিশ্ৰই। সভাখনত ৪৬ সুৰমা সমষ্টিৰ অঞ্জন দাসো উপস্থিত থকাৰ লগতে আন আন ভালেমান নেতা-কৰ্মী উপস্থিত আছিল।
‘বাওঁমৰ্চা বিৰোধী শক্তিয়ে অতীতত বাওঁমৰ্চাক হৰুৱাবৰ বাবে বাৰে বাৰে চেষ্টা কৰি আহিছে। কিন্তু তেওঁলোক সদায়ে ব্যৰ্থ হৈ আহিছে।’ এইদৰে কয় নেতাজনে।
তেওঁ কয় যে বাওঁশক্তিৰ ভেটিটো বেচ মজবুত, কাৰণ খাটিখোৱা মানুহবোৰ ঐক্যবদ্ধ হৈ আছে আৰু তেওঁলোকে সুপ্ৰশাসন আৰু বিকাশৰ উপকাৰ পাই আছে।
তেওঁ কয় যে বাওঁ দলৰ লক্ষ্য কেৱল নিৰ্বাচন জিকাটোৱেই নহয়। লগতে শোষণ বিহীন সমাজ এখনৰ বাবে শক্তিশালী আন্দোলন গঢ়ি তোলা।
‘আমি তেওঁ এইবুলিও কয় যে বাওঁ ভাবাদৰ্শক কেৰালা, পশ্চিম বংগ আৰু ত্ৰিপুৰাৰ সীমা অতিক্ৰমী দেশৰ খাটিখোৱা মানুহৰ মাজলৈ লৈ যাব লাগিব।
