‘অসমৰ সত্ৰসমূহে কালোত্তীৰ্ণ ভূমিকা গ্ৰহণ কৰি আহিছে মানৱ সেৱা আৰু সমাজ সেৱাৰ জৰিয়তে। এই কথা সকলোৱে ভক্তিভাৱেৰে অনুধাৱন কৰিব পাৰিব লাগিব। তেতিয়াহে গুৰুজনাৰ সত্ৰস্থাপনৰ উদ্দেশ্য সাৰ্থক হ’ব’। এই ভাষ্য মুখ্য মন্ত্ৰী সৰ্বানন্দ সোণোৱালৰ।
উত্তৰ কামৰূপৰ ৰঙিয়া চহৰৰ সমীপৱৰ্তী বালিসত্ৰত বুধবাৰে ৰাজ্যৰ মুখ্যমন্ত্ৰী সৰ্বান্দ সোনোৱালে ঐতিহাসিক বালিসত্ৰৰ নৱ নিৰ্মিত বংশীগোপাল মন্দিৰৰ দুৱাৰ সম্পূৰ্ণ মাঙ্গলিক অনুষ্ঠানৰে শুভ উদ্বোধন কৰে। দুৱাৰ মুকলি অনুষ্ঠানৰ পিচতে মুখ্যমন্ত্ৰীগৰকীয়ে সত্ৰ চৌহদত স্থানীয় সমাজ কৰ্মী পিনক কলিতাৰ সভাপতিত্বত অনুষ্ঠিত হোৱা এখন ৰাজহুৱা সভাত অংশগ্ৰহন কৰে।
উক্ত সভাত মুখ্য মন্ত্ৰীয়ে কয় যে দেশৰ ২৯ খন ৰাজ্য আৰু ৭ খন কেন্দ্ৰীয় শাসিত ৰাজ্যৰ ভিতৰতে অসমৰ সৌন্দৰ্য আন কাৰোৰে স’তে তুলনা নহয়। তাৰোপৰি তাৎপৰ্যমূলক মন্তব্য কৰি কয় যে সফলতাৰ কোনো চমু পথ নাই।
তেওঁ ভাষণ প্ৰসংগত কয় যে ৰাজ্যত বিজেপি চৰকাৰৰ দিনত দুৰ্নীতিক প্ৰশ্ৰয় দিয়া নহ’ব আৰু সকলো কাম কাজ যাতে নিয়ম মতে হয় তাৰ প্ৰতি ৰাইজক নজৰ ৰাখিবলৈ অনুৰোধ জনায়।
আনহাতে প্ৰাক্তন সত্ৰাধিকাৰ বৃন্দাবন গোস্বামীৰ স্মৃতিত সত্ৰ চৌহদত প্ৰতিমূৰ্তি নিৰ্মাণ কৰাৰ ক্ষেত্ৰত ৰাজ্য চৰকাৰে সকলো ধৰণৰ সহায়- সহযোগিতা আগবঢ়াব বুলিও মখ্যমন্ত্ৰীগৰাকীয়ে কয়।
অনুষ্ঠানটোত হাজো সমষ্টিৰ বিধায়িকা চুমন হৰিপ্ৰিয়াৰ লগতে ৰঙিয়া সমষ্টিৰ বিধায়ক ভৱেশ কলিতা, কমলপুৰ সমষ্টিৰ বিধায়ক সত্যব্ৰত কলিতা, মুক্তিযোদ্ধা কৃষ্ণ লহকৰ, পৰ্যটন বিভাগৰ উপাধ্যক্ষ নৱদ্বীপ কলিতা, সমাজ সেৱক ৰাতুল শৰ্মা, এআইডিচি জিতু তালুকদাৰ উপস্থিত থাকে।
উল্লেখ্য যে ১৬০০ শতিকাতে স্থাপিত সত্ৰখনৰ আৰিয়া আৰু সভা মহোৎসৱ ২৬ জানুৱাৰিৰ পৰা বৰ্ণাধ্য কাৰ্যসূচীৰে আৰম্ভ হ’ব।
