বিশ্বনাথত ছ’চিয়েল মিডিয়াত সোপাধৰাৰ আতংক বিয়পোৱা দুজনক আটক
বিশ্বনাথৰ কেইবাখনো গাৱঁত সোপাধৰা ওলাইছে বুলি গাৱঁৰ সাধাৰণ মানুহৰ মনত আতংক বিয়পাই দিব খোজা দুষ্টচক্ৰৰ সন্ধানত তৎপৰ হৈ পৰিছে বিশ্বনাথৰ আৰক্ষী।
উল্লেখযোগ্য যে যোৱা কিছুদিন ধৰি বিশ্বনাথৰ কেইবাখনো গাৱঁত সোপাধৰাই শিশুসকলক লক্ষ্য কৰি লৈছে বুলি এটা অসাধু চক্ৰই ছ’চিয়েল মিডিয়াৰ যোগেদি অপপ্ৰচাৰ চলাই আছে। আনকি চক্ৰটোৱে মহিলাকো আক্ৰমণৰ লক্ষ্য কৰি লৈছে বুলি প্ৰচাৰ কৰাত আতংকিত হৈ পৰিছে বিশ্বনাথ আৰু বিহালী সমষ্টিৰ কেইবাখনো গাৱঁৰ ৰাইজ।
মন কৰিব লগীয়া কথাটো হ’ল এই ভিত্তিহীন খবৰটোৰ মূল উৎস কি সেয়া এতিয়াও স্পষ্ট হোৱা নাই। কিন্তু ছচিয়েল মিডিয়াত এই সোপাধৰাৰ উৰা বাতৰি দ্ৰুতগতিত ঘূৰি ফুৰিছে। আনহাতে আজিলৈকে কোনো এজন গাঁওবাসীয়ে দেখা নাই সোপাধৰাক।
মিছা হ’লেও সাধাৰণ মানুহৰ মাজত আতংকৰ সৃষ্টি কৰা বাতৰিটো বিয়পোৱাসকলৰ বিৰুদ্ধে কঠোৰ হৈছে বিশ্বনাথ আৰক্ষী। শেহতীয়াকৈ আজি এনেদৰে ছ’চিয়েল মিডিয়াত অপপ্ৰচাৰ চলোৱা অসাধু চক্ৰটোৰ মাজৰ বুলি সন্দেহ কৰা দুজন যুৱকক বিশ্বনাথ আৰক্ষীয়ে আটক কৰিছে। তেওঁলোক দুজন হ’ল বিশ্বনাথৰ কদমনিৰ দিব্যজ্যোতি শইকীয়া আৰু খঁৰাশিমলুৰ দীপক খাওন্দ। দুয়োজনে যুৱকেই ফেইচবুকত সোপাধৰা ওলোৱাৰ বাতৰি পোষ্ট কৰিছিল বুলি সন্দেহ কৰা হৈছে৷
উল্লেখযোগ্য যে লিচু খোৱাৰ ফলত মাৰাত্মক নিপাহ ভাইৰাছত আক্ৰান্ত হৈ বহু সংখ্যক লোক চিকিৎসালয়ত ভৰ্তি হোৱাৰ ভুৱা বাতৰিও ছ’চিয়েল মিডিয়াৰ যোগে দ্ৰুতগতিত প্ৰচাৰিত হৈ আছে যোৱা কিছু দিন ধৰি।
আৰক্ষী প্ৰশাসন শেহতীয়াকৈ এনেকুৱা অপপ্ৰচাৰৰ বিৰুদ্ধে কঠোৰ হোৱাৰ ইংগিত পোৱা গৈছে।