বিহালীত পথ অৱৰোধ : আছু নেতা, সাংবাদিকক গুলীয়াই মৰোৱাৰ ভাবুকি দিয়াত অভিযুক্ত ‘বন মাফিয়াক’ গ্ৰেপ্তাৰ কৰা নাই আৰক্ষীয়ে

বিশ্বনাথ জিলাৰ বিহালীত বন মাফিয়া আৰু আৰক্ষী বিষয়াৰ বিৰুদ্ধে সৰৱ হৈ উঠিছে বিভিন্ন দল-সংগঠন৷ বিহালী থানাৰ ভাৰপ্ৰাপ্ত আৰক্ষী বিষয়া প্ৰদীপ কুমাৰ বৰুৱাৰ বিৰুদ্ধে আজি বুধবাৰে টায়াৰ জ্বলাই ৰাষ্ট্ৰীয় ঘাইপথ অৱৰোধ কৰে বিভিন্ন দল-সংগঠনে।

আছুৰ বিহালী আঞ্চলিকৰ সম্পাদক অৰূপ তামুলী আৰু সাংবাদিক দিগন্ত শইকীয়াক এন ডি এফ বিদ্বাৰা গুলীয়াই হত্যা কৰাৰ ভাবুকি প্ৰদান কৰা বুলি অভিযোগ উঠা বন মাফিয়া কুমুদ শইকীয়াক বিহালী থানাৰ আৰক্ষী বিষয়াগৰাকীয়ে ৰক্ষণাবেক্ষন প্ৰদান কৰাৰ অভিযোগ তোলে প্ৰতিবাদকাৰীসকলে।

বন মাফিয়াগৰাকীৰ বিৰুদ্ধে গোচৰ তৰাৰ পাছতো বোলে কোনো আইনী ব্যৱস্থা লোৱা নাই আৰক্ষীয়ে।

২৪ ঘণ্টাৰ ভিতৰত বন মাফিয়া তথা কেবিনেট মন্ত্ৰী ৰনজিৎ দত্তৰ সোঁহাতস্বৰূপ কুমুদ শইকীয়াক গ্ৰেপ্তাৰ কৰা আৰু বিহালী থানাৰ ভাৰপ্ৰাপ্ত আৰক্ষী বিষয়াক ২৪ ঘন্টাৰ ভিতৰত বদলি কৰাৰ দাবী জনায় প্ৰতিবাদকাৰীসকলে।

প্ৰতিবাদকাৰীসকলে ৰাষ্ট্ৰীয় ঘাইপথ অৱৰোধ কৰাৰ ফলত বিহালীত স্বাভাৱিক জীৱনযাত্ৰা ব্যাহত হয়।