বোকাখাতত শান্তিপূর্ণ পৰিবেশ সৃষ্টিৰ বাবে বিভিন্ন দল-সংগঠনৰ প্রতিনিধিৰে আজি বৈঠকত মিলিত হয় বােকাখাত মহকুমা প্রশাসন।
বােকাখাত মহকুমাধিপতি কাৰ্যালয়ৰ সভাকক্ষত মহকুমাধিপতি বিবেক শ্যামৰ সভাপতিত্বত আয়ােজিত এই বৈঠকত মহকুমাটোৰ বিভিন্ন স্থানত অলপতে সংঘতিত হােৱা তিনিওটা নাৰীজনিত অপৰাধ আৰু এই ক্ষেত্ৰত আৰক্ষীয়ে গ্ৰহণ কৰা আইনগত ব্যৱস্থাৰ কথা প্ৰকাশ কৰে বােকাখাতৰ মহকুমা আৰক্ষী বিষয়া বিতুল চেতিয়াই।
মহকুমা আৰক্ষী বিষয়া গৰাকীয়ে কয় যে সংঘটিত তিনিটা অপৰাধৰ ভিতৰত প্রথম দুটা অপৰাধৰ লগত জড়িত অভিযুক্ত দুজনক আৰক্ষীয়ে তাৎক্ষনিকভাৱে গ্রেপ্তাৰ কৰাৰ লগতে তৃতীয়টো অপৰাধৰ লগত জড়িত এজনক ইতিমধ্যে গ্রেপ্তাৰ কৰা হৈছে।
বৈঠকতে বিষয়াগৰাকীয়ে সকলাে দল-সংগঠনকে মহকুমাটোত অপৰাধ ৰোধ কৰাৰ ক্ষেত্ৰত সহায়-সহযােগিতা আগবঢ়াবলৈ আহ্বান জনায়। বৈঠকত মহকুমাধিপতি গৰাকীৰ লগতে উপস্থিত সকলাে দল-সংগঠনৰ প্রতিনিধিয়ে আন্দোলনৰ নামত শান্তি-শৃঙ্খলা ভংগ নকৰিবলৈ তথা জনসাধাৰণৰ স্বাভাৱিক জীৱন ব্যাহত নকৰিবলৈ সকলােকে আহ্বান জনায়।
আনহাতে দল-সংগঠন সমূহেও বােকাখাত মহকুমাৰ শান্তি-শৃঙ্খলা অটুত ৰখাৰ বাবে আৰক্ষী-প্ৰশাসনক সকলাে প্ৰকাৰৰ সহযােগিতা আগবঢ়োৱাৰ লগতে গণতান্ত্রিক আন্দোলনৰ নামত আইন ভংগকাৰীৰ বিৰুদ্ধে প্রশাসনে আইনগত ব্যৱস্থা হাতত ল’লে কোনােধৰণৰ বিৰােধিতা কৰা নহ’ব বুলিও বৈঠকত উল্লেখ কৰে।
লগতে বৈঠকত দল-সংগঠনৰ প্রতিনিধিবর্গই প্রশাসনক অবৈধ সুৰা তথা অন্যান্য নিচাযুক্ত দ্রব্যৰ প্ৰচলনৰ ক্ষেত্রত কঠোৰ ব্যৱস্থা হাতত ল’বলৈ অনুৰােধ জনায়।
আৰু মহকুমাধিপতি গৰাকীয়ে এই ক্ষেত্ৰত জনসাধাৰণক অবৈধ সুৰাৰ বিক্ৰীৰ বিষয়ে সংশােধিত আবকাৰী আইনৰ অধীনত অভিযােগ দাখিল কৰিবলৈ আহ্বান জনায় আৰু এই ক্ষেত্ৰত মহকুমা প্রশাসনে কঠোৰ ব্যৱস্থা হাতত ল’ব বুলিও উল্লেখ কৰে।
আজিৰ বৈঠকত বােকাখাতৰ বিভিন্ন দল-সংগঠন প্রতিনিধিবর্গৰ লগতে নির্বাচনী বিষয়া জিমলী শইকীয়া কাকতি, সহকাৰী আয়ুক্ত শান্তনু গগৈ, পুব অসম বােকাখাত সমষ্টিৰ প্ৰাক্তন বিধায়ক জিতেন গগৈ, ৰাজহচক্ৰ বিষয়া খনিন্দ্র দাস, বন্যপ্রাণী সংমণ্ডলৰ ডি, এফ,অ ৰােহিনী বল্লভ শইকীয়া উপস্থিত থাকে ।
