বোকাজানত অৰুণাচলী সুৰা কঢ়িয়াই অনা ট্ৰাক জব্দ
আজি পাৰ হৈ যোৱা নিশা কাৰ্বি আংলঙৰ বোকাজানত আবকাৰী বিভাগে অৰুণাচলী সুৰা কঢ়িয়াই অনা এখন ট্ৰাক জব্দ কৰে। জানিব পৰা মতে সুৰাভৰ্তি ট্ৰাকখনৰ চালকজন আন্ধাৰৰ সুযোগ লৈ পলায়ন কৰে। জব্দ কৰা সুৰাখিনিৰ মূল্য কমেও ২০ লাখ টকা হ’ব বুলি আৰক্ষীৰ সূত্ৰই জনাইছে। ঘটনাটোৱে সকলো পক্ষকে আচৰিত কৰাৰ লগতে অৰুণাচলৰ পৰা সুৰা লৈ অহা ট্ৰাকখন কেনেকৈ শোণিতপুৰ, নুমলীগড় আদি স্থানৰ ক’তো ধৰা নপৰাকৈ পাৰ হৈ আহিব পাৰিলে এই প্ৰশ্ন উঠিছে।
জানিব পৰামতে আবকাৰী আয়ুক্তই ঘটনাটোত জড়িতসকলৰ বিৰুদ্ধে ভাৰতীয় দণ্ডবিধিৰ অধীনত এটা গোচৰ ৰুজু কৰাৰ নিৰ্দেশ দিছে। লগতে আবকাৰী মন্ত্ৰী পৰিমল শুক্লবৈদ্যই ঘটনাটোৰ তদন্ত কৰিবলৈ নিৰ্দেশ দিছে।
উল্লেখযোগ্য যে যোৱা এমাহ মানৰ পূৰ্বে অৰুণাচলী সুৰাৰ চোৰাং ব্যৱসায়ীৰ বিৰুদ্ধে আবকাৰী বিভাগে উত্তৰ অসমত অভিযান চলাইছিল। অৰুণাচলৰ পৰা অহা কম দামৰ সুৰাৰ উত্তৰ অসমত বহুল প্ৰচলন আছে। এনে সুৰাই ৰাজ্য চৰকাৰক ৰাজহ লোকচানত পেলাইছে বুলি দীৰ্ঘদিনৰ পৰা অভিযোগ উত্থাপিত হৈ আহিছে।
আনহাতে সুৰাৰ অবৈধ ব্যৱসায়ীক সহায় কৰি কৰ ফাঁকিত জড়িত হৈ অহাৰ অভিযোগত ৰাজ্য চৰকাৰে ইতিপূৰ্বে আবকাৰী বিষয়া অমৰেন্দ্ৰ দাসক গ্ৰেপ্তাৰ কৰিছিল।