বোকাজানত সংঘটিত ভয়ঙ্কৰ অগ্নিকাণ্ডত বিদ্যালয় ভস্মীভূত

কাৰ্বি আংলং জিলাৰ বোকাজানত আজি এক ভয়ঙ্কৰ অগ্নিকাণ্ড সংঘটিত হয়। অগ্নিকাণ্ডটোৰ ফলত এখন বিদ্যালয় ভস্মীভূত হয়।

প্ৰাপ্ত তথ্য মতে বোকাজান মহকুমাৰ খটখটি আৰক্ষী থানাৰ অন্তৰ্গত মাটিপুলৰ চেইণ্ট মেৰী নামৰ ইংৰাজী মাধ্যমৰ বিদ্যালয়খনৰ দহটাকৈ কোঠালী অগ্নিকাণ্ডটোৰ জুইত জাহ যায়৷

স্থানীয় লোকে জনোৱা অনুসৰি আজি পুৱাৰ ভাগত পথৰ দাতিত থকা বিদ্যালয়খন পৰা জুই ওলাই থকা প্ৰত্যক্ষ কৰি পথেৰে আহ-যাহ কৰাৰ লোকে চিঞৰ-বাখৰ কৰাত স্থানীয় লোকসকল ওলাই আহি অগ্নিনিৰ্বাপক বাহিনীক খবৰ দিয়ে।

খবৰ পায়ে বোকাজান নগৰস্থিত অগ্নিনিৰ্বাপক বাহিনীৰ লোক ঘটনাস্থলীত উপস্থিত হৈ জুই নিৰ্বাপিত কৰিবলৈ সক্ষম হয় যদিও ইতিমধ্যে অগ্নিকাণ্ডটোত বিদ্যালয়খনৰ প্ৰধান শিক্ষকৰ কোঠাৰ লগতে শিক্ষকসকলৰ কোঠা, কাৰ্যালয় কক্ষৰ উপৰি৬ টাকৈ শ্ৰণী কোঠা জুইত জাহ যায়৷

এতিয়ালৈকে অগ্নিকাণ্ডটো কেনেদৰে সংঘটিত হল তাক জানিব পৰা হোৱা নাই, আনহাতে বিদ্যালয় কৰ্তৃপক্ষই অগ্নিকাণ্ড সন্দৰ্ভত খটখটি আৰক্ষী থানাত এখন এজাহাৰ দাখিল কৰিছে।