অসমৰ ভূমি আন্দোলনৰ এগৰাকী সক্ৰিয় নেতা আদিত্য ৰাভাক আৰক্ষীয়ে গ্ৰেপ্তাৰ কৰা কাৰ্যক লৈ তীব্ৰ প্ৰতিক্ৰিয়াৰ সৃষ্টি হৈছে। বৰদুৱাৰ বাগান ভূমি পট্টন দাবী সমিতিৰ উপদেষ্টা তথা নিখিল ৰাভা জাতীয় পৰিষদৰ মুখপাত্রগৰাকীক কৰা এই গ্ৰেপ্তাৰক ভূমি অধিকাৰ যৌথ সংগ্রাম সমিতিয়ে তীব্ৰ ভাষাৰে গৰিহণা জনাইছে। এক প্ৰেছ বিজ্ঞপ্তিৰ জৰিয়তে সমিতিয়ে অভিযোগ কৰিছে যে ভূমি আন্দোলনটোক দুৰ্বল কৰিবলৈকে এক ভিত্তিহীন অভিযোগত তেওঁক গ্ৰেপ্তাৰ কৰা হৈছে। এয়া চৰকাৰৰ এক গভীৰ ষড়যন্ত্ৰ বুলি তেওঁলোকে দাবী কৰিছে।
যৌথ সংগ্রাম সমিতিৰ আহ্বায়ক গোবিন্দ ৰাভা, কৃষ্ণ গগৈ, বিদিশা বৰ্মন আৰু সুব্রত তালুকদাৰে প্ৰকাশ কৰা মতে, বৰ্তমান নিজৰ মাটিৰ অধিকাৰ বিচাৰি অসমৰ বিভিন্ন প্ৰান্তত থলুৱা আৰু জনজাতীয় লোকসকল একগোট হৈছে। ৰাইজৰ এই গণতান্ত্ৰিক আন্দোলনক শেষ কৰিবলৈ আৰু জনসাধাৰণৰ মাজত বিভাজন সৃষ্টি কৰি আন্দোলনৰ নেতৃত্বৰ ভাবমূৰ্তি নষ্ট কৰিবলৈ চৰকাৰে এই পথ বাছি লৈছে। আন্দোলনৰ প্ৰতি ৰাইজৰ সঁহাৰি দেখি চৰকাৰ ভয়ভীত হৈছে আৰু সেইবাবেই আদিত্য ৰাভাৰ দৰে জনপ্ৰিয় নেতাক মিছা গোচৰত কাৰাগাৰলৈ নিক্ষেপ কৰিছে বুলি তেওঁলোকে উল্লেখ কৰে।
উল্লেখযোগ্য যে, কালি সন্ধিয়া এটা সমবায় ক্ষুদ্ৰ সঞ্চয় বেংকৰ ধনৰ খেলিমেলিৰ অভিযোগত আদিত্য ৰাভাক গ্ৰেপ্তাৰ কৰা হৈছিল। কিন্তু সমিতিয়ে দাবী কৰা মতে, যি দুগৰাকী ব্যক্তিয়ে তেওঁৰ বিৰুদ্ধে গোচৰ তৰিছে, তেওঁলোকৰ সেই সমবায়খনৰ লগত কোনো ধৰণৰ সম্পৰ্কই নাই। কেৱল শাসকীয় বিজেপি দলৰ নেতা হোৱাৰ বাবেই আৰক্ষীয়ে তেওঁলোকৰ মিছা গোচৰ পঞ্জীয়ন কৰিছে। এই সমগ্ৰ ঘটনাক ৰাজনৈতিকভাৱে উদ্দেশ্যপ্ৰণোদিত বুলি আক্ষেপ প্ৰকাশ কৰি সমিতিয়ে আদিত্য ৰাভাক অতি শীঘ্ৰে মুক্তি দিবলৈ দাবী জনাইছে। লগতে গণতান্ত্ৰিক প্ৰতিবাদী কণ্ঠক এনেদৰে দমন কৰা কাৰ্য অনতিবিলম্বে বন্ধ কৰিবলৈ তেওঁলোকে চৰকাৰলৈ আহ্বান জনাইছে।
