বৰপেটাত আৰক্ষীৰ অভিযানত এ টি এম লুটৰ পৰিকল্পনাৰে বাহৰ পাতি থকা ডকাইতৰ দল আটক
বৰপেটা জিলাৰ হাউলী আৰক্ষীয়ে যোৱা নিশা অভিযান চলাই ৭ জনীয়া এটা ডকাইতৰ দল আটক কৰিবলৈ সক্ষম হয়।
উল্লেখযোগ্য যে ডকাইতৰ দলটোৱে বৰষুণৰ বতৰৰ সুযোগ লৈ বৰপেটা জিলাৰ হাউলীত থকা এ টি এম লুট কৰাৰ বাবে হাউলীত বাহৰ পাতিছিল ৷ কিন্তু হাউলী আৰক্ষীয়ে এক গোপন সূত্ৰৰ পৰা আগতীয়াকৈ তথ্য লাভ কৰাত তাৎক্ষণিকভাৱে ডকাইতৰ দলটোৰ বিৰুদ্ধে অভিযান চলায়।
ফলত হাউলী থানাৰ ভাৰপ্ৰাপ্ত বিষয়া পংকজ দাসৰ নেতৃত্বত আৰক্ষীয়ে চলোৱা অভিযানত হাউলীৰ হালাপাকুৰীৰ পৰা ডকাইতৰ দলটোক আটক কৰিবলৈ সক্ষম হয় ৷ অৱশ্যে নিশাৰ আন্ধাৰৰ সুযোগ লৈ আন এটা ডকাইত পলাই যাবলৈ সক্ষম হয়। আৰক্ষীয়ে লগতে ডকাইতৰ দলটোৱে ব্যবহাৰ কৰা এ এছ ০১১ বি ডি ৪২১২ নম্বৰৰ টাটা ছুমোখনো জব্দ কৰিবলৈ সক্ষম হয়।
আটকাধীন ডকাইত কেইজনক ক্ৰমে আৰক্ষীয়ে বৰপেটাৰ পাটাচাৰকুচিৰ বাবুল আলী (২৪) ছাইদুল আলী (২১) আৰু হজৰত আলী(২৫), দোলোপাথাৰৰ শহৰ অলী (২৬), নলবাৰী জিলাৰ ঘগ্ৰাপাৰৰ জাকিৰ হুছেইন (২৮), বিটিএডি তামুলপুৰৰ সাহেব উদ্দিন (৪৭) আৰু হবি আলী বুলি চিনাক্ত কৰিছে।
আৰক্ষীৰ সূত্ৰে জানিব পৰা মতে দীৰ্ঘদিন ধৰি এটিএম লুটৰ লগতে চুৰি, ডকাইতি আৰু গাড়ী চুৰিৰ ঘটনাৰ সৈতে জড়িত আছিল আন্তৰাজ্যিক এই ডকাইতৰ দলটো ৷