ৰাজ্যখনত নিৱনুৱা সমস্যা বৃদ্ধি পোৱাৰ সময়তে বৰপেটা জিলাৰ সৰভোগৰ পেৰা গাঁও পথাৰৰ এজন খেতিয়কে ষ্ট্ৰবেৰি খেতিৰ জৰিয়তে স্বাৱলম্বিতাৰ নিদৰ্শন দাঙি ধৰিছে।
প্ৰাপ্ত তথ্য মতে প্ৰফুল্ল কুমাৰ দাস নামৰ খেতিয়কজনে ষ্ট্ৰবেৰি খেতি কৰাৰ লগতে নেমুটেঙা, মিনপালন, ধান, আপেল জাতীয় বগৰী, শাক পাচলি আদি খেতিৰ জৰিয়তে স্বাৱলম্বী হোৱাত স্থানীয় গাঁওবাসী লোকসকলেও আনন্দ প্ৰকাশ কৰিছে। লগতে দাসৰ এই সফলতাই স্থানীয় যুৱক সকলকো অনুপ্ৰাণিত কৰিব বুলি একাংশই মত পোষণ কৰিছে।
চৰকাৰী সাহায্য অবিহনে এই খেতিয়কজনে ২০০৮ চনৰপৰা নিজৰ পকেটৰ ধন খৰচ কৰি খেতি কৰি আহিছে।
ইতিমধ্যে প্ৰফুল্ল কুমাৰ দাসক অনুকৰণ কৰি গাঁৱৰ বহু যুৱকে ষ্ট্ৰবেৰি খেতি কৰিবলৈ আগ্ৰহ প্ৰকাশ কৰিছে। অহা বছৰ ২ বিঘা মাটিত ষ্ট্ৰবেৰি খেতি কৰাৰ প্ৰস্তুতি চলাব বুলি দাসে জানিবলৈ দিয়ে। লগতে ৫০০টকা কিলো ষ্ট্ৰবেৰি বিক্ৰী কৰিবলৈ পাই খেতি কৰাৰ উৎসাহ দুগুণ বৃদ্ধি হোৱাৰ কথাও ব্যক্ত কৰে দাসে।
