সদৌ বৰপেটা ৰঙালী বিহু উদযাপন সমিতিৰ উদ্যোগত অহা ১০ আৰু ১১ মেত ৪০ সংখ্যক কেন্দ্ৰীয় ৰঙালী বিহু সন্মিলনৰ আয়োজন কৰা হৈছে। কাৰ্যসূচী অনুসৰি ১০ মেৰ পুৱা বিহু পতাকা উত্তোলন কৰিব সদৌ বৰেপটা ৰঙালী বিহু উদযাপন সমিতিৰ সভাপতি তথা সৰুক্ষেত্ৰী সমষ্টিৰ প্ৰাক্তন বিধায়ক ডাঃ তাৰাপ্ৰসাদ দাসে আৰু চহিদ তৰ্পণ অনুষ্ঠান মুকলি কৰিব বিহু সন্মিলনৰ কাৰ্যকৰী সভাপতি তথা বৰপেটা সমষ্টিৰ বিধায়ক গুনীন্দ্ৰ নাথ দাসে।
ইয়াৰ পিছতে সমন্বয় সাংস্কৃতিক শোভাযাত্ৰা মুকলি কৰিব বৰপেটা জিলাৰ আৰক্ষী অধীক্ষক ভায়োলেট বৰুৱাই। বিয়লি মুকলি বিহু প্ৰতিযোগিতা মুকলি কৰিব সদৌ অসম ছাত্ৰ সন্থাৰ উপসভাপতি প্ৰদীপ দাসে। সন্ধিয়া বাৰে ৰহণীয়া সাংস্কৃতিক অনুষ্ঠান মুকলি কৰিব মাধৱ চৌধুৰী মহাবিদ্যালয়ৰ অৱসৰপ্ৰাপ্ত অধ্যক্ষ অৰ্জুন দাসে।
১১ মেৰ পুৱা চাফাই অভিযান মুকলি কৰিব গীতিকাৰ, সুৰকাৰ শিল্পী সুধীৰ দাসে। বৃক্ষৰোপন কৰিব মুখ্য সম্পাদক দেবদ্বীৱ দাসে। ১০ বজাত চিত্ৰাংকন আৰু ভেশচন প্ৰতিযোগিতা অনুষ্ঠিত হ’ব। সন্ধিয়া সাংস্কৃতিক অনুষ্ঠান উদ্বোধন কৰিব বৰপেটা জিলাৰ উপায়ুক্ত থানেশ্বৰ মালাকাৰে।
আনহাতে ৰঙালী বিহু সন্মিলনৰ সতে সংগতি ৰাখি প্ৰকাশিতব্য স্মৃতিগ্ৰন্থ উন্মোচন কৰিব অসম বিধান সভাৰ প্ৰাক্তন অধ্যক্ষ তথা হাউচফেডৰ অধ্যক্ষ ৰণজিৎ কুমাৰ দাসে। ৰঙালী বিহু সন্মিলনৰ অন্তিম দিনৰ সাংস্কৃতিক অনুষ্ঠানত শিল্পী জে পি দাস, শান্তা উজীৰ, সন্ধ্যা মেনন, কুইন দাস, সুৰজিৎ মালাকাৰ, প্ৰশান্ত ৰাজখোৱা আৰু প্ৰিয়ংকা ভড়ালীয়ে সংগীত পৰিবেশন কৰিব। কেন্দ্ৰীয় ৰঙালী বিহু সন্মিলনৰ এই দুদিনীয়া কাৰ্যসূচীত ৰাইজৰ সহায়-সহযোগ আৰু উপস্থিতি কামনা কৰিছে বিহু উদযাপন সমিতিয়ে।
