আজি ৰাইজৰ দলৰ কেন্দ্ৰীয় কাৰ্যালয়ত এখন সংবাদ মেল সম্বোধন কৰি সাধাৰণ সম্পাদক ৰাছেল হুছেইন, তথ্য আৰু প্ৰচাৰ বিভাগৰ তত্বাৱধায়ক দেবাংগ সৌৰভ গগৈ আৰু জাতীয় যুৱ বাহিনীৰ অংকুমান বৰদলৈয়ে অসম চৰকাৰৰ মুখ্যমন্ত্ৰী ড° হিমন্ত বিশ্ব শৰ্মাৰ অধীনস্থ লোক নির্মাণ বিভাগত এতিয়া আইন, আৰু চৰকাৰী নীতি নিয়ম সম্পূৰ্ণৰূপে উপেক্ষিত হৈ পৰাৰ কথা তথ্যসহ দাঙি ধৰে। তেখেতে অভিযোগ কৰি কয় সঠিক প্ৰক্ৰিয়াৰ অবিহনেই কিছুমান বিশেষ ঠিকাদাৰী গোটক ঠিকা প্ৰদান কৰা হৈছে।
তেখেতে কালি ২৪ জুলাই তাৰিখ বৃহস্পতিবাৰে ডিব্ৰুগড় চিকিৎসা মহাবিদ্যালয়ত মুখ্যমন্ত্ৰীৰ এখন সভাৰ বাবে নিৰ্মাণ হোৱা মঞ্চ-পেণ্ডেলৰ নামত প্রায় সম্পূৰ্ণ হোৱাৰ পাছত ৯২ লাখ টকাৰ নিবিদা আহ্বান প্ৰক্ৰিয়াৰ উদ্ধৃতি দি কয় যে পেণ্ডেল নিৰ্মাণৰ কাম প্রায় সম্পূৰ্ণ হোৱাৰ পাছতহে সভাৰ মাত্র দুদিন পূর্বে এদিনৰ সময় দি নিবিদা আহ্বান কৰা হৈছিল। ঠিক একেধৰণে, ২০২৩ চনৰ ‘মেগা বিহু’ অনুষ্ঠানৰ অস্থায়ী ভেন্যুৰ বাবেও পাঁচ মাহ পিছতহে নিবিদা আহ্বান কৰা হৈছিল, যাৰ জৰিয়তে বিতর্কিত ঠিকাদাৰী প্ৰতিষ্ঠান ‘কি কি’ য়ে ১২.৬৮ কোটি টকাৰ কাম লাভ কৰিছিল।
ইয়াৰ পিছতেই পুনৰ সৰু সজাইত অনুষ্ঠিত ‘ঝুমইৰ বিনন্দিনী’ অনুষ্ঠানৰ বাবেও ‘কি কি’ গোটে ৮.৮৪ কোটি টকাৰে ঠিকা লাভ কৰে, য’ত অংশগ্ৰহণকাৰী আছিল কেৱল ‘কি কি’ আৰু তেওঁৰ ভাতৃ কমলজিৎ সিঙৰ মালিকানাধীন প্রতিষ্ঠানসমূহ- ACME Events & Expo আৰু Capital Overlays। এই সকলো ঠিকা একেলগে, বিনা প্রতিযোগিতাত, একেই পৰিয়ালৰ ভিতৰতে আৱন্টন হোৱাৰ ঘটনা লোক নির্মাণ বিভাগত চলি থকা গভীৰ ছিণ্ডিকেটতন্ত্ৰ আৰু স্বজন-তোষণৰ পৰিচয় দিয়ে।
ইন্দিৰা গান্ধী ষ্টেডিয়ামৰ মেৰামতিৰ বাবেও কমলজিৎ সিঙৰ Capital Overlays য়ে পাইছে ১.২৮ কোটি টকাৰ ঠিকা। সাধাৰণ সম্পাদক ৰাছেল হুছেইনে শেহতীয়াভাৱে লোক নিৰ্মাণ বিভাগৰ এগৰাকী অভিযন্তাৰ অকাল মৃত্যুৱে বিভাগটোত চলি থকা ব্যাপক অনিয়মৰ ভয়ংকৰ ছবি উন্মোচন কৰাৰ কথা উল্লেখ কৰি কয় যে ১২ কোটি টকীয়া মিনি ষ্টেডিয়াম নিৰ্মাণৰ অনিয়ম ধৰা নপৰিবলৈয়ে ‘ৱৰ্ক এষ্টিমেট’ প্ৰস্তুত কৰাৰ বাবে কার্যবাহী অভিযন্তা এছ ডি অ’ই হেঁচা দিছিল।
ৰাইজৰ দলে শীঘ্ৰেই সমগ্ৰ ঘটনাৰ নিৰপেক্ষ তদন্ত কৰাৰ বাবে অৱসৰপ্ৰাপ্ত ন্যায়াধীশৰ অধীনত এখন তদন্ত আয়োগ গঠন কৰি দোষীক উচিত শাস্তি বিহিবলৈ দাবী জনায়।
