অসমৰ ব্ৰহ্মপুত্ৰ উপত্যকা আৰু বৰাক উপত্যকাৰ মানুহৰ দৃষ্টিভংগি, মনস্তাত্ত্বিক স্পন্দনৰ যে আকাশ-পাতল পাৰ্থক্য আছে তাক প্ৰমাণ কৰিলে ৮ মে’ত শিলচৰত অনুষ্ঠিত নাগৰিকত্ব সংশোধনী বিধেয়ক সন্দৰ্ভত গঠিত যুটীয়া সংসদীয় কমিটীৰ শুনানিৰ দৃশ্যই। ৭ মে’ত গুৱাহাটীৰ খানাপাৰাস্থিত অসম প্ৰশাসনিক পদাধিকাৰী মহাবিদ্যালয়ত অনুষ্ঠিত শুনানিত অসমৰ বিভিন্ন ঠাইৰ পৰা অহা ব্যক্তি, দল-সংগঠন, শিল্পী আদিয়ে বিধেয়কখনৰ সামগ্ৰিক বিৰোধিতা কৰাৰ পিছ দিনা বৰাক উপত্যকাত অনুষ্ঠিত শুনানিত অধিক সংখ্যক ব্যক্তি, দল-সংগঠনে হিন্দু বাংলাদেশীক নাগৰিকত্ব দিয়াৰ সপক্ষে থিয় দিলে।
শুনানিৰ সময়ত খানাপাৰাৰ দৰে ব্যাপক জনসমাগম দেখা নগ’ল যদিও অংশগ্ৰহণ কৰা প্ৰায়বোৰ দল-সংগঠন, ব্যক্তিয়ে আহি বিধেয়কখনৰ সমৰ্থনত সাক্ষ্য দান তথা স্মাৰক-পত্ৰ দাখিল কৰে। ফলত নাগৰিকত্ব সংশোধনী বিধেয়কক কেন্দ্ৰ কৰি বৰাক আৰু ব্ৰহ্মপুত্ৰ উপত্যকাৰ মানুহৰ দুই মেৰুত অৱস্থানৰ দৰে হৈ পৰিল।
জানিব পৰামতে, তাত কেৱল কৃষক মুক্তি আৰু এ আই য়ু ডি এফে বিধেয়কখনৰ বিৰোধিতা কৰিছে। এই দুয়োটা দল-সংগঠনে বিধেয়কখনৰ বিৰোধিতা কৰি স্মাৰকপত্ৰ দিয়া বুলি এক বিশেষ সূত্ৰই জানিবলৈ দিছে। তাৰ বিপৰীতে কৰিমগঞ্জ জিলাৰ ৮৬টা আৰু হাইলাকান্দি জিলাৰ ১০১টা দল-সংগঠনে হিন্দু বাংলাদেশীক নাগৰিকত্ব প্ৰদানৰ সপক্ষে যুক্তি দাঙি ধৰি বিধেয়কখনলৈ সমৰ্থন আগ বঢ়ায়।
জানিব পৰা মতে, প্ৰতিকূল বতৰৰ বাবে নিৰ্ধাৰিত সময়তকৈ প্ৰায় ডেৰ ঘণ্টা পলমকৈ শিলচৰ এন আই আই টিত শুনানি আৰম্ভ হৈছিল।
