মাৰ্ঘেৰিটাত ছাত্ৰীক বলাৎকাৰ, হত্যাৰ ঘটনা : যাৱজ্জীৱন কাৰদণ্ডেৰে দৃষ্টান্তমূলক শাস্তি অপৰাধীক
প্ৰায় আঢ়ৈ বছৰ পূৰ্বে তিনিচুকীয়া জিলাৰ মাৰ্ঘেৰিটা মহাবিদ্যালয়ৰ এগৰাকী ছাত্ৰীক মহাবিদ্যালয়ৰ পৰা ঘৰলৈ জনবিৰল পথেৰে গৈ থকা অৱস্থাত ৩জন লম্পট যুৱকে ধৰ্ষণ কৰি অতি নৃশংসভাৱে হত্যা কৰাৰ ঘটনাটোৰ ৬ ফেব্ৰুৱাৰিত ৰায় দান কৰে আদালতে। মাৰ্ঘেৰিটা মহকুমা ছেছন ন্যায়াধীশে অপৰাধীকেইজনক যাৱজ্জীৱন কাৰাদণ্ডেৰে দৃষ্টান্তমূলক শাস্তি বিধান দিয়ে।
যাৱজ্জীৱন কাৰাদণ্ড পোৱা হত্যাকাৰী তিনিটা হ’ল- ক্ৰমে নুৰুদ্দিন লস্কৰ, নাছিৰুদ্দিন লস্কৰ আৰু ফাইজুৰ ৰহমান।
উল্লেখযোগ্য যে প্ৰায় আঢ়ৈ বছৰৰ পূৰ্বে ২০১৫ বৰ্ষৰ ২৯ আগষ্টত মাৰ্ঘেৰিটা মহাবিদ্যালয়ৰ ছাত্ৰী থুখিং টিখাক কলেজৰ পৰা নিজৰ ঘৰলৈ গৈ থকা অৱস্থাত অপৰাধীকেইজনে ছাত্ৰীগৰাকীক ঘৰৰ পৰা মাত্ৰ কিছু দূৰতে বলাৎকাৰ কৰি অতি নৃশংসভাৱে হত্যা কৰি পেলাই থৈ গৈছিল। এই হত্যাকাৰী তিনিটাই সেই সময়ছোৱাত অসম ৰাজ্যিক বিদ্যুৎ পৰিষদৰ লেখাপানী সংমণ্ডলৰ গৃহ নিৰ্মাণৰ শ্ৰমিক ৰূপে কাম কৰি আছিল।
জানিব পৰা মতে, মাৰ্ঘেৰিটা মহকুমাস্থিত প্ৰথম শ্ৰেণীৰ ছেছন ন্যায়াধীশৰ আদালতৰ ছেছন ন্যায়াধীশ আব্দুল হাকিমে ভাৰতীয় দণ্ডবিধিৰ ৩৭৬ আৰু ৩০২ ধাৰাৰ অধীনত হত্যাকাৰী তিনিটাক যাৱজ্জীৱন কাৰাদণ্ডেৰে দণ্ডিত কৰে।