মাৰ্ঘেৰিটাৰ মাইনিং কোম্পানীৰ ৱৰ্কশ্বপত এন এছ চি এন (আই এম) ৰ আক্ৰমণ: জ্বলাই দিলে ৫ খনকৈ গাড়ী
অসম অৰুণাচল সীমান্তৰ মাৰ্ঘেৰিটাৰ লিডুৰ টিকক পাহাৰত অৱস্থিত এ এন ই মাইনিং কোম্পানীৰ ৱৰ্কশ্বপত যোৱা নিশা সশস্ত্ৰ এন এছ চি এনৰ প্ৰায় ২৫ জনীয়া এটা দলে আক্ৰমণ চলায়। কোম্পানীৰ ৫ খনকৈ গাড়ীত অগ্নিসংযোগ কৰে। নগা উগ্ৰপন্থীৰ দলটো এন এছ চি এন (আই এম) ৰ বুলি জানিব পৰা গৈছে। উগ্ৰপন্থীৰ দলটোৱে এ এন ই মাইনিং কোম্পানীৰ সমীৰ দাস নামৰ এগৰাকী কৰ্মচাৰীক মাৰধৰ কৰাৰ ফলত গুৰুতৰভাৱে আহত হয়। কোম্পানীটোৰ বহুকেইজন কৰ্মচাৰী ঘটনাস্থলীত আবদ্ধ হৈ থকাত তেওঁলোকক উদ্ধাৰৰ বাবে মাৰ্ঘেৰিটা মহকুমা আৰক্ষী, অৰ্দ্ধ সামৰিক বাহিনী তথা সেনাৰ দল তালৈ গৈছে।
কেন্দ্ৰীয় চৰকাৰ আৰু এন এছ চি এন(আই এম) ৰ সৈতে ফেমৱৰ্ক এগ্ৰিমেন্ট স্বাক্ষৰ কৰাৰ পিছৰে পৰা অসম নাগালেণ্ড সীমান্তত এন এছ চি এনৰ সন্ত্ৰাস ক্ৰমে বৃদ্ধি পাব ধৰিছে। অসমৰ বিষয়ো জড়িত হৈ থকা এই এগ্ৰিমেন্ট ৰূপায়ন কৰাৰ বাবে তৎপৰ হৈ পৰাৰ পিছতে সীমান্ত অঞ্চল অতি স্পৰ্শকাতৰ হৈ পৰিছে।
সম্প্ৰতি গোটেই অঞ্চলটোতে উত্তেজনাই বিৰাজ কৰি আছে। নগা উগ্ৰপন্থীয়ে লিডু টিকক পাহাৰত এটা বছৰৰ ভিতৰতে একেটা উদ্যোগত বাৰে বাৰে আক্ৰমণ কৰাৰ ঘটনাই চাঞ্চল্যৰ সৃষ্টি কৰিছে। পূৰ্বতে এন এছ চি এন উগ্ৰপন্থীয়ে তিনিখনকৈ গাড়ী জ্বলাই দিয়াৰ পিছত যোৱা নিশা পুনৰ পাঁচখনকৈ গাড়ী জ্বলাই দিয়াৰ ঘটনাই তেওঁলোকে অঞ্চলটোত আধিপত্য বিস্তাৰৰ প্ৰচেষ্টা চলোৱাৰ কথাকে প্ৰতিপন্ন কৰিছে।
জানিব পৰা মতে যোৱা নিশাৰ সমগ্ৰ ঘটনাটোৰ দৃশ্য চিচিটিভি কেমেৰাত বন্দী হয়। এক সূত্ৰই জনোৱা মতে ধন দাবীক কেন্দ্ৰ কৰিয়েই যোৱা নিশাৰ ঘটনাটো সংঘটিত হোৱাৰ সন্দেহ কৰা হৈছে।