মুখ্য মন্ত্ৰীৰ চাহ জনজাতি ফুটবল প্ৰতিযোগিতা : গোলাঘাট জিলা চাহ জনজাতি একাদশ বিজয়ী

বোকাখাতৰ খেল পথাৰত আজি বিয়লি মুখ্যমন্ত্ৰীৰ চাহ জনজাতি ফুটবল প্ৰতিযোগিতাৰ গোলাঘাট মণ্ডলৰ চূড়ান্ত প্ৰতিযোগিতা অনুষ্ঠিত হয় ৷

আজিৰ এই চূড়ান্ত খেলত গোলাঘাট জিলা চাহ জনজাতি একাদশ আৰু কাছাৰ জিলা চাহ জনজাতি একাদশে অংশ গ্ৰহন কৰে ৷

খেলখনত গোলাঘাট জিলা চাহ জনজাতি একাদশে কাছাৰ একাদশক তিনি শূন্য গলত পৰাজিত কৰি মণ্ডলৰ শ্ৰেষ্ঠ দল হিচাবে নিৰ্বাচিত হৈ ফুটবল প্ৰতিযোগিতাখনৰ কোৱাৰ্টাৰ ফাইনেলত প্ৰৱেশ কৰে ৷

আজিৰ চূড়ান্ত খেলৰ প্ৰাক মুহুৰ্তত আয়োজিত উদ্বোধনী অনুষ্ঠানত গোলাঘাটৰ উপায়ুক্ত গৌৰৱ ভোথ্ৰা, অতিৰিক্ত উপায়ুক্ত উৎপল দলে, বোকাখাতৰ মহকুমাধিপতি বিবেক শ্যাম, ৰাজহ চক্ৰ বিষয়া ধীৰাজ দাস আৰু বোকাখাতৰ মহকুমা আৰক্ষী বিষয়া বিতুল চেতিয়া উপস্থিত থাকে ৷

গোলাঘাট জিলা ক্ৰীড়া বিষয়া ৰিলিপ ৰংহাঙে আঁত ধৰা এই অনুষ্ঠানত অতিথি সকলক ফুলাম গামোছাৰে আদৰণি জনোৱা হয় ৷

খেলৰ দ্বিতীয়াৰ্দ্ধত গোলাঘাট জিলা একাদশৰ হৈ বসন্ত ভূঞাই ২ টা আৰু হেমন্ত টুৰীয়ে এটা গল দি দলক জয়যুক্ত কৰে ৷

বোকাখাত খেল পথাৰত অনুষ্ঠিত এই বিশেষ ফুটবল খেলখন পৰিচালনা কৰে ৰঞ্জিত শ্ৰেষ্ঠ , দিগন্ত সন্দিকৈ , খগেন তাঁতী আৰু ধীৰেন পেগুয়ে ৷

খেলৰ শেষত বসন্ত ভূঞাক খেলখনৰ শ্ৰেষ্ঠ খেলুৱৈ পুৰস্কাৰ প্ৰদান কৰাৰ উপৰিও গোলাঘাট জিলা একাদশক শ্ৰেষ্ঠ আৰু কাছাৰ একাদশ দলক দ্বিতীয় শ্ৰেষ্ঠ দলৰ বঁটা প্ৰদান কৰা হয় ৷