বডো খুৰাইজামে পৰিচলনা কৰা ‘ইমা সাৱিত্ৰী’ নামৰ মণিপুৰী তথ্যচিত্ৰখনে ১৫তম মুম্বাই ৰাষ্ট্ৰীয় চলচ্চিত্ৰ মহোৎসৱত ৰাষ্ট্ৰীয় প্ৰতিযোগিতা শাখাত শ্ৰেষ্ঠ তথ্যচিত্ৰৰ বঁটা লাভ কৰিছে।
এইবাৰ যোৱা ২৮ জানুৱাৰীৰ পৰা আৰম্ভ হোৱা মহোৎসৱখন দুবছৰৰ মূৰে মূৰে অনুষ্ঠিত হয়। যোৱা ৩ ফেব্ৰুৱাৰীত মুম্বাইৰ নেশ্যনেল চেন্টাৰ ফৰ পাৰফৰ্মিং আৰ্টছৰ টাটা থিয়েটাৰত বঁটা প্ৰদান অনুষ্ঠান অনুষ্ঠিত হৈছিল।
এই বঁটাত এখন ৰূপৰ স্মাৰক, নগদ ৫ লাখ টকা, এখন প্ৰশংসা পত্ৰ আৰু প্ৰমাণ পত্ৰ আগবঢ়োৱা হয়। প্ৰশংসা পত্ৰখনত কোৱা হৈছে, ‘’নান্দনিক বৈচিত্ৰ্যতাৰে এগৰাকী মহান নাট্য অভিনেত্ৰীৰ নিজস্ব পৃথিৱীখনলৈ আমাক লৈ গৈছে।‘’
মণিপুৰী তথ্যচিত্ৰখনে নাটকৰ কিংবদন্তি শিল্পী সাৱিত্ৰীৰ জীৱন প্ৰতিফলিত কৰিছে।
তথ্য আৰু সম্প্ৰচাৰ মন্ত্ৰালয়ৰ অধীনত ফিল্ম ডিভিজনে আয়োজন কৰা আন্ত:ৰাষ্ট্ৰীয় চলচ্চিত্ৰ মহোৎসৱখনত মুখ্য অতিথি হিচাপে উপস্থিত আছিল মহাৰাষ্ট্ৰৰ ৰাজ্যপাল চি বিদ্যাসাগৰ ৰাও।
এই বছৰ মহোৎসৱত বিশ্বৰ ৩৬ খন দেশৰ পৰা অভিলেখ সংখ্যক ৭৯০ খন ছবিয়ে যোগদান কৰিছিল। যোগদান কৰা মুঠ ছবিৰ পৰা ৪৩ খন ছবিক ৰাষ্ট্ৰীয় প্ৰতিযোগিতাৰ বাবে নিৰ্বাচিত কৰিছিল।
ছবিখন মাছেক মংগল ফিল্মছৰ অধীনত গুৰুমায়ুম ৰনিতাই প্ৰযোজনা কৰিছে। চিনেমাটোগ্ৰাফী কৰিছে ইৰম মাইপাকে। সম্পাদনা কৰিছে শংখজিত বিশ্বাস আৰু সংগীত দিছে হেইছনাম টম্বাই।
এই ছবিখন গোৱাত অনুষ্ঠিত ভাৰতৰ ৪৭ তম আন্ত:ৰাষ্ট্ৰীয় চলচ্চিত্ৰ মহোৎসৱত পেনোৰামা শাখাত উদ্বোধনী ছবি আছিল।
২০১৬ চনত ৰাজ্যিক চলচ্চিত্ৰ মহোৎসৱত শ্ৰেষ্ঠ অকাহিনী ছবিৰ বঁটা লাভ কৰা ‘ইমা সাৱিত্ৰী’য়ে কাঠমাণ্ডুৰ ফিল্ম ছাউথ এছিয়া, লণ্ডনৰ উইমেন অফ দ্য লেনছ, কলকাতা আন্ত:ৰাষ্ট্ৰীয় চলচ্চিত্ৰ মহোৎসৱ, ৰাছিয়াৰ কিনোপ্ৰবা আদিৰ দৰে বহু সন্মানীয় চলচ্চিত্ৰ মহোৎসৱত অংশগ্ৰহণ কৰিছিল।
