মেঘালয়ত শাসনাধিষ্ঠিত কংগ্ৰেছ দলে অহা বছৰৰ প্ৰথম ভাগতে ৰাজ্যখনত হ’ব লগীয়া বিধানসভা নিৰ্বাচনৰ বাবে বৰদিনৰ পিছতে দুটা পৰ্য্যায়ত প্ৰাৰ্থীৰ তালিকা প্ৰকাশ কৰাৰ কথা। সাংবাদিকে সোধা এটা প্ৰশ্নৰ উত্তৰত ৰাজ্যখনৰ মুখ্য মন্ত্ৰী মুকুল চাংমাই এই ইংগিত দিয়ে।
‘আমি খুব সোনকালেই এইটো কৰিব বিচাৰো। কিন্তু বৰদিনৰ পিছতহে কৰিম। আমি হয়তো দুটা পৰ্য্যায়ত নাম বিলাক ঘোষণা কৰিম।’ মুখ্য মন্ত্ৰীজনে কয়। কোৱা উচিত হ’ব যে মুকুল চাংমাই দুটা সমষ্টিৰ পৰা নিৰ্বাচন খেলাৰ সম্ভাৱনা আছে। তেওঁৰ গৃহ সমষ্টি আমপটিগিৰিৰ লগতে চংচাক সমষ্টিৰ পৰা তেওঁ প্ৰতিদ্বন্দ্বিতা কৰাৰ কথা। চংচাক সমষ্টিক বৰ্তমান এন পি পিৰ নিহিম ডি শ্বিৰাই প্ৰতিনিধিত্ব কৰি আছে। এটা নিৰ্ভৰযোগ্য সূত্ৰই জনোৱা মতে কংগ্ৰেছে ৬০ জনীয়া বিধানসভা সমষ্টিৰ আটাইকেইটাতে প্ৰাৰ্থী দিব। মুকুল চাংমাৰ মতে বিসম্বাদী কংগ্ৰেছ বিধায়কসকলে প্ৰতিনিধিত্ব কৰি থকা সমষ্টিকেইটাত প্ৰাৰ্থী হিচাপে প্ৰাৰ্থী দিবলৈ দলৰ কৰ্মী-সমৰ্থকৰ পৰা হেঁচা আহি আছে। তেওঁ দাবী কৰে যে কংগ্ৰেছে প্ৰতিশ্ৰুতিসম্পন্ন নেতাৰ পৰা প্ৰস্তাৱ পাই আছে। এওঁলোক কংগ্ৰেছ দলত যোগদান কৰিবলৈ আগ্ৰহী আৰু নিজকে সম্ভাব্য প্ৰাৰ্থী হিচাপে প্ৰক্ষেপ কৰিব বিচাৰে। ই ভৱিষ্যতৰ বাবে এক সুকীয়া মাপকাঠীস্বৰূপ হ’ব, কাৰণ ই মানুহৰ বাবে কাম কৰিব খোজা লোকৰ মাজত এক উৎসাহৰ জন্ম দিব। এইদৰে কয় মুখ্য মন্ত্ৰীজনে।
আনহাতে জানিব পৰা মতে বিসম্বাদী কংগ্ৰেছী বিধায়ক প্ৰেষ্ট’ন টাইছংগে প্ৰতিনিধিত্ব কৰি থকা পিনুৰচলা বিধানসভা সমষ্টিৰ পৰা দলে এইবাৰ আন এজনক টিকট দিয়াটো প্ৰায় নিশ্চিত হৈছে। তেওঁ হ’ল চিকিৎসক ড০ জে লিংডো।
