যুৱপ্ৰজন্মৰ হাৰ্টথ্ৰ’ব জুবিন গাৰ্গে অতিক্ৰম কৰিলে ৪৫ টা বসন্ত

প্ৰায় ১৬০০০ গীত পৰিৱেশন কৰা যুৱ প্ৰজন্মৰ হাৰ্টথ্ৰ’ব জুবিন গাৰ্গৰ আজি জন্মদিন। বিগত কেইবছৰমান নিজৰ জন্মদিনটো কলাগুৰু মহোৎসৱ হিচাপে পালন কৰা জুবিনে এইবাৰো নিশা ১২ বজাত কেক কাটি বন্ধুবৰ্গৰ সৈতে পালন কৰিলে ওপজা দিনটো। এইবছৰো জুবিনক দেখা গ’ল এক ব্যতিক্ৰমী ৰূপত। জুবিনৰ খাৰঘুলিৰ বাসগৃহত এজাক কণমানিৰ সৈতে দেৱালত চিত্ৰ অংকনত ব্যস্ত হৈ পৰা দেখিবলৈ পোৱা গ’ল। তেওঁ আজিৰ পবিত্ৰ দিনটিত খাৰঘুলিৰ বাসগৃহৰ যি দেৱাল সেই দেৱালত ইচ্ছ্যুক সকলোকে চিত্ৰ অংকনৰ বাবে আমন্ত্ৰণ জনায়। উল্লেখযোগ্য যে শেহতীয়াকৈ কেইখনমান অসমীয়া চলচ্চিত্ৰৰ নিৰ্মাণৰ সৈতে জড়িত হৈ পৰা জুবিনে সংগীতৰ লগতে অভিনয় কৰা মুনীন বৰুৱা পৰিচালিত ‘প্ৰিয়াৰ প্ৰিয়’ নামৰ ছবিখনে দৰ্শকৰ সমাদৰ লাভ কৰিবলৈ সক্ষম হৈছে। আজিৰ দিনটোত জুবিন অনুৰাগী সকলে তেওঁৰ ওপজা দিনত তেওঁক শুভেচ্ছা জ্ঞাপন কৰা দেখা গ’ল।