বৰাক উপত্যকাৰ লগতে ত্ৰিপুৰা, মণিপুৰ, মিজোৰামৰ দৰে চুবুৰীয়া ৰাজ্যৰ জনসাধাৰণৰ অত্যাধুনিক চিকিৎসা সেৱা লাভৰ দিশত সহায় হোৱাকৈ মুখ্য মন্ত্ৰী সৰ্বানন্দ সোণোৱালে আজি শিলচৰত বিভিন্ন আধুনিক চিকিৎসা ব্যৱস্থাৰে সমৃদ্ধ ৩০০ খন বিছনাযুক্ত ‘জীৱনজ্যোতি ইনষ্টিটিউট অব মেডিকেল চায়েন্সেছ’ হাস্পাতালখন আনুষ্ঠানিকভাৱে উদ্বোধন কৰে।
এই উপলক্ষে আয়োজিত অনুষ্ঠানত মুখ্য মন্ত্ৰী গৰাকীয়ে ৰাজ্যখনৰ ৩৩ খন জিলাৰ ৬৫ লাখ পৰিয়ালৰ সামাজিক সুৰক্ষা আৰু অৰ্থনৈতিক নিৰাপত্তা নিশ্চিত কৰাৰ উদ্দেশ্যেৰে ৰাজ্য চৰকাৰে দৃঢ়তাৰে কাম কৰি আহিছে বুলি কয়। লগতে মুখ্য মন্ত্ৰী গৰাকীয়ে কয় যে ৰাজ্য চৰকাৰে বৰাক নদী খননৰ কাম আৰম্ভ কৰিছে আৰু স্বামী বিবেকানন্দ আন্তৰ্জাতিক গৱেষণা কেন্দ্ৰৰ কামো শীঘ্ৰে আৰম্ভ কৰাৰ বাবে পদক্ষেপ গ্ৰহণ কৰিছে।
আনহাতে অনুষ্ঠানত ভাষণ প্ৰদান কৰি স্বাস্থ্য আৰু পৰিয়াল কল্যাণ বিভাগৰ মন্ত্ৰী ড০ হিমন্ত বিশ্ব শৰ্মাই কয় যে স্বাস্থ্য খণ্ডৰ উন্নয়নৰ বাবে চৰকাৰী বেচৰকাৰী প্ৰয়াসৰ সমন্বয় সাধনৰ ওপৰত ৰাজ্য চৰকাৰে গুৰুত্ব আৰোপ কৰিছে।
স্বাস্থ্য মন্ত্ৰী গৰাকীয়ে লগতে কয় যে ‘আয়ুস্মান ভাৰত’ নামৰ আঁচনিখন অহা নৱেম্বৰৰ পৰা ৰাজ্যখনত আৰম্ভ হ’ব। আৰু ইয়াৰ জৰিয়তে ২৭ লাখ দুখীয়া পৰিয়াল উপকৃত হ’ব।
লগতে এই আঁচনিৰ জৰিয়তে প্ৰতিবছৰে হিতাধিকাৰী সকলে ৫ লাখ টকাকৈ লাভ কৰিব বুলিও স্বাস্থ্য মন্ত্ৰী গৰাকীয়ে কয়।
তাৰোপৰি স্বাস্থ্য মন্ত্ৰী গৰাকীয়ে কৰিমগঞ্জ চিকিৎসা মহাবিদ্যালয়ৰ কাম আৰু শিলচৰত স্থাপন কৰিব লগীয়া নতুন দন্ত চিকিৎসা মহাবিদ্যালয়ৰ নাম ভৰ্তি এই বছৰতে আৰম্ভ হ’ব বুলি কয়।
লগতে ৰাজ্য চৰকাৰ আৰু টাটাৰ সহযোগত সমগ্ৰ ৰাজ্যখনৰ বিভিন্ন ঠাইত স্থাপন কৰিব লগীয়া কৰ্কট হস্পাতালৰ দুখন ক্ৰমে শিলচৰ আৰু কৰিমগঞ্জত স্থাপন কৰা হ’ব বুলিও মন্ত্ৰী গৰাকীয়ে কয়।
আজিৰ অনুষ্ঠানত বন মন্ত্ৰী পৰিমল শুক্লবৈদ্য, বিধায়ক দিলীপ পাল, প্ৰাক্তন কেন্দ্ৰীয় মন্ত্ৰী কবীন্দ্ৰ পুৰকায়স্থ, প্ৰাক্তন মন্ত্ৰী গৌতম ৰয়কে ধৰি বৰাক উপত্যকৰা বহু কেইগৰাকী বিধায়ক উপস্থিত থাকে।
