শিৱসাগৰৰ বিভিন্ন অঞ্চলত ১৫০ৰো অধিক হাতীয়ে প্ৰৱেশ কৰি ত্ৰাসৰ সৃষ্টি কৰিছে
অসমৰ বনাঞ্চলৰ দাতি কাষৰীয়া জনাঞ্চলৰ লোক সমূহৰ এতিয়া বনৰীয়া হাতীৰ সন্ত্ৰাসত উজাগৰে নিশা কটাবলগীয়া হৈছে। বিভিন্ন ঠাইত হাতী-মানুহৰ সংঘাতে তীব্ৰ ৰূপ ধাৰন কৰাৰ ফলত মানুহৰ লগতে বনৰীয়া জীৱ-জন্তুয়েও প্ৰাণ হেৰুৱাবলগীয়া হৈছে। ঠিক সেইদৰে শিৱসাগৰ জিলাৰ জাগাৰাহাবি, শান্তিপুৰ, চেনিমৰা আদি ঠাইত প্ৰকাণ্ড হাতীৰ জাক এটাই অঞ্চলবাসীক সন্ত্ৰাসিত কৰি ৰাখে। অঞ্চলটোৰ দীঘলীহাবি গাওঁৰ ভানু গগৈ আৰু কৃষ্ণ বৰাৰ বাসগৃহ হাতীৰ জাকটোৱে সম্পূৰ্ণকে ভাঙি তচ-নচ কৰি পেলায়। যাৰ ফলত এতিয়া এই পৰিয়াল দুটাৰ অৱস্থা তথৈ নচ।
মন কৰিবলগীয়া যে এই হাতীৰ জাকটোৱে কালি পুৱাতে চেনিমৰা-জাগাৰাহাবি অঞ্চলৰ শস্য পথাৰৰে আহি অঞ্চল বাসীৰ যথেষ্ট ক্ষতি সাধন কৰে। হাতীৰ জাকটো লোকালয়ত প্ৰৱেশ কৰাৰ তিনিদিন পূৰ্বে বুকাবীলৰ ওচৰত এটা হাতীৰ পোৱালীৰ জন্ম হয়। হাতী পোৱালিটোক উদ্ধাৰৰ বাবে এই বৃহৎ হাতীৰ জাকটো প্ৰৱেশ কৰা বুলি স্থানীয় ৰাইজে আশংকা ব্যক্ত কৰিছে। ১৫০ টাৰো অধিক বৃহৎ জাকটো দেখি পথাৰত থকা গৰু, ছাগলী, ম’হ আদি প্ৰাণৰ শংকাত পলায়ন কৰে। যাৰ ফলত এটা ম’হ আৰু গৰুৰ মৃত্যু ঘটে। এইদৰে বৃহৎ হাতীৰ জাকে অঞ্চলত প্ৰৱেশ কৰাৰ ঘটনা এইবাৰেই প্ৰথম বুলি স্থানীয় লোকে আমাৰ সাংবাদিকৰ আগত জানিব দিয়ে। লক্ষ্যণীয় যে হাতীৰ জাকটো খেদি পঠিয়াবলৈ স্থানীয় ৰাইজ তথা বন বিভাগে অশেষ কষ্ট কৰাৰ পিছতো সফল ন’হল।