শিৱসাগৰ জিলাৰ অনুসূচিত জাতি ছাত্ৰ সন্থাই ৫ দফীয়া দাবী উত্থাপন কৰি আজি শিৱসাগৰ জিলা উপায়ুক্তৰ কাৰ্য্যালয়ৰ সন্মুখত এক অৱস্থান ধৰ্মঘটৰ কাৰ্যসূচী ৰূপায়ণ কৰে।
অৱস্থান ধৰ্মঘট কাৰ্যসূচীটোত সংগঠনটোৱে ‘অসমৰ বান গৰাখহনীয়াক ৰাষ্ট্ৰীয় সমস্যা ৰূপে স্বীকৃতি দিয়া, বান গৰাখহনীয়া ৰোধ কৰা, অনুসূচিত জাতিৰ অন্যতম উপজাতি জালো-মালো সকলক বন্ধ হৈ থকা জাতিগত প্ৰমাণ পত্ৰ অতি শীঘ্ৰে দিয়াৰ ব্যৱস্থা কৰা, ভুৱা জাতিগত প্ৰমাণ পত্ৰৰ ক্ষেত্ৰত বিহিত ব্যৱস্থা গ্ৰহণ কৰা আৰু ভূমিহীন অনুসূচিত জাতিৰ লোকসকলৰ ক্ষেত্ৰত খাজানাৰ ৰচিদহীন শিক্ষাগ্ৰহণত ব্যৱহৃত হোৱা প্ৰমাণ পত্ৰ সমূহ আবেদনৰ সুবিধা কৰি দিয়া’ আদি ৫ টা দাবী উত্থাপন কৰে।
অৱস্থান ধৰ্মঘট কাৰ্যসূচীৰ পিছত সংগঠনটোৱে শিৱসাগৰ জিলা উপায়ুক্তৰ জৰিয়তে মুখ্যমন্ত্ৰীলৈ স্মাৰকপত্ৰ প্ৰেৰণ কৰে। জিলা উপায়ুক্তৰ হৈ স্মাৰকপত্ৰ গ্ৰহণ কৰে শিৱসাগৰ ৰাজহ চক্ৰ বিষয়া সম্প্ৰীতি গোস্বামীয়ে।
আনহাতে উক্ত দাবী সমূহৰ ক্ষেত্ৰত চৰকাৰৰ পৰা অতিশীঘ্ৰে কোনো সদুত্তৰ লাভ নকৰিলে সংগঠনটোৱে গণতান্ত্ৰিক ভাৱে ইয়াতকৈও জংগী আন্দোলনৰ কাৰ্যসূচী গ্ৰহণ কৰিব বুলি স্পষ্ট কৰি দিয়ে।
ইফালে সংগঠনটোৰ সভাপতি পৰশজ্যোতি দাস আৰু সাধাৰণ সম্পাদক মৃদুল দাসে কয় যে, ‘ইয়াৰ পূৰ্বেও আমি শিৱসাগৰ জিলাৰ বিভিন্ন গৰাখহনীয়া পীড়িত অঞ্চলসমূহ প্ৰশাসন-চৰকাৰক অৱগত কৰি এই বান গৰাখহনীয়া ৰোধৰ ব্যৱস্থা গ্ৰহণ কৰিবলৈ জিলা প্ৰশাসনক স্মাৰকপত্ৰ দিয়াৰ লগতে প্ৰতিবাদী কাৰ্যসূচী হাতত লৈছিল যদিও আজিকোপতি চৰকাৰ তথা প্ৰশাসনে কোনো ব্যৱস্থা গ্রহণ নকৰিলে। যাৰ বাবে আজি পুনৰ এনে দৰে প্ৰতিবাদী কাৰ্য্যসূচী হাতত ল’বলৈ বাধ্য হৈছো।’
