৮৩ নং মাৰ্ঘেৰিটা বিধানসভা সমষ্টিৰ অন্তৰ্গত তিনিচুকীয়া জিলাৰ মাৰ্ঘেৰিটাত অৱস্থিত অবৈধ কয়লা খনিত বিপজ্জনক খননৰ প্ৰক্ৰিয়াকে ধৰি অবৈধ কয়লা খননক লৈ আন্তৰ্জাতিক মানৱ অধিকাৰ পৰিষদে তীব্ৰ উদ্বেগ প্ৰকাশ কৰিছে। এই অবৈধ কাৰ্যকলাপসমূহ শীঘ্ৰে বন্ধ কৰিবলৈ কেন্দ্ৰীয় তদন্তকাৰী সংস্থাকে (চিবিআই) আৰু ক’ল ইণ্ডিয়া লিমিটেড (চিআইএল)ক শীঘ্ৰে ব্যৱস্থা গ্ৰহণৰ দাবী জনাইছে।
সূত্ৰ অনুসৰি, বি গণেশ নামৰ এজন ব্যক্তি এই অবৈধ খনন কাৰ্যকলাপৰ সৈতে সম্পৰ্কিত। আই এইচ আৰ চিয়ে সকীয়াই দিছে যে, যদি দ্ৰুত পদক্ষেপ গ্ৰহণ কৰা নহয়, তেন্তে ইয়াৰ ফলত পৰিৱেশৰ ভয়ংকৰ ক্ষতি হোৱাৰ লগতে স্থানীয় লোকৰ চাকৰি হেৰুওৱাকে ধৰি ৰাষ্ট্ৰীয় সম্পদৰ অপচয় আৰু বহুজনৰ জীৱন বিপন্ন হোৱাৰ আশংকা আছে।
আই এইচ আৰ চিৰ তিনিচুকীয়া জিলা সমিতিৰ সাধাৰণ সম্পাদক এল ৰতন সিঙে এক প্ৰেছ-বিজ্ঞপ্তিত অসম চৰকাৰ আৰু কেন্দ্ৰীয় চৰকাৰক কেইবাটাও দাবী উত্থাপন কৰিছে ইয়াৰ ভিতৰত মাৰ্ঘেৰিটাত চলি থকা অবৈধ খননৰ সন্দৰ্ভত চিবিআইৰ পূৰ্ণাঙ্গ তদন্তৰ দাবী উত্থাপন কৰিছে। ইয়াৰো পৰি কয়লা চুৰি আৰু স্থানান্তৰৰ লগত জড়িত ব্যক্তিসকলক বিচাৰি উলিয়াবলৈ CIL-ৰ আভ্যন্তৰীণ পৰীক্ষা, ১৯৫৭ চনৰ খনি আৰু খনিজ আইন আৰু ভাৰতীয় দণ্ডবিধিৰ ধাৰাসমূহৰ কঠোৰ প্ৰয়োগ, অঞ্চলটোৰ কয়লা মজুত স্থানসমূহৰ বিশদ অধ্যয়ন, যাতে প্ৰকৃতি সংৰক্ষণ, স্থানীয় জনতাৰ স্বাৰ্থ ৰক্ষা আৰু চৰকাৰলৈ যথাযথ আয় প্ৰবাহ নিশ্চিত হয়।
এই সন্দৰ্ভত আই এইচ আৰ চিয়ে স্পষ্টভাৱে কয়, যদি এই অবৈধ খনন চলি থাকিলে ই পৰিৱেশ, জনজীৱন আৰু ৰাষ্ট্ৰীয় সম্পদৰ ক্ষেত্ৰত ভয়াবহ পৰিণাম কঢ়িয়াই আনিব।
