পিতনিৰ পৰা উদ্বাৰ কৰি বালিপৰা সংৰক্ষিত বনাঞ্চলত ১১ ডালকৈ অজগৰ
বালিপৰা শোণিতপুৰ চাৰিদুৱাৰৰ বালিপৰা সংৰক্ষিত বনাঞ্চলত আজি পুনৰ ১১ ডালকৈ প্ৰকাণ্ড অজগৰ সাপ মুকলি কৰে সৌৰভ বৰকটকীয়ে। সৌৰভ বৰকটকী হৈছে বনবিভাগৰ অবৈতনিক ৱাৰ্ডেন, তেখেতে সাপৰ প্ৰতি বিশেষ সংৰক্ষণমূলক পদক্ষেপ গ্ৰহণ কৰা তথা সাপৰ বিষয়ে জনসাধাৰণক সচেতন কৰাৰ বাবে তেখেতে সৰ্প-বান্ধৱ প্ৰকৃ্তিপ্ৰেমী হিচাপে পৰিচিতি লাভ কৰিছে।
আজি দিনৰ ১২:০০ বজাত সংৰক্ষিত বনাঞ্চলখনৰ দমাইলৰ পিতনিত জিলাখনৰ তেজপুৰ, ভোমোৰাগুৰি, নপাম, চানমাৰী আদি কৰি বিভিন্ন ঠাইৰপৰা ৰাইজৰ খবৰৰ ভিত্তিত বৰকটকীয়ে উদ্ধাৰ কৰা ১১ ডালকৈ প্ৰকাণ্ড অজগৰ সাপ আজি জিলা বন বিভাগৰ সহযোগত মুকলি কৰি দিয়ে। আজি মুকলি কৰা সাপকেইডালৰ আটাইতকৈ প্ৰকাণ্ড সাপডাল দহ ফুট আৰু তিনিডালৰ দৈৰ্ঘ্য ন ফুট আছিল। আটাইকেইডাল সাপক বৰকটকীয়ে উদ্ধাৰ কৰাৰ পিছত নিজা ব্যৱস্থাপনাৰে সাপকেইডালক তত্বাৱধান কৰাৰ অন্তত আজি এনেদৰে বালিপৰা সংৰক্ষিত বনাঞ্চলখনত মুকলি কৰে।
সাপকেইডালক মুকলি কৰি দি বৰকটকীয়ে জনাইছে যে কাজিৰঙা ৰাষ্ট্ৰীয় উদ্যানত বৰ্তমান সময়ত হোৱা বানপানীৰ বাবে জিলাখনৰ বিভিন্ন স্থানত সাপবোৰে প্ৰৱেশ কৰিছে। আজিৰ অনুষ্ঠানত জিলা বনবিষয়া ৰঞ্জিৎ কোঁৱৰ, বন বিভাগৰ সদৰ ৰেঞ্জৰ বনবিষয়া দেৱব্ৰত গগৈ, বালিপৰা আৰু তেজপুৰৰ প্ৰকৃতপ্ৰেমী সংবাদকৰ্মীৰ দল বন আৰু বিভাগৰ কৰ্মী উপস্থিত থাকে।
একেদৰে, আজি জিলা বনবিষয়া ৰঞ্জিৎ কোঁৱৰৰ পৃষ্ঠপোষকতাত ঢাৰিকাটি-চামলগা পথত বালিপৰা সংৰক্ষিত বনাঞ্চলত বন্যহস্তীৰ খাদ্যৰ বাবে কলগছ, ঔটেঙা গছকে আদি কৰি কেইবাবিধো গছ ৰোপণ কৰা হয়।