ড’পিং টেষ্টত দোষী সাব্যস্ত হৈ সাময়িক নিলম্বনৰ সন্মুখীন হোৱা কমনৱেলথ গেইমছত স্বৰ্ণ পদক বিজয়ী মণিপুৰৰ ভাৰোত্তোলক সঞ্জীতা চানুৰ সমৰ্থনত মণিপুৰৰ মহিলা সংগঠন আৰু ভাৰতীয় ক্ৰীড়া প্ৰাধিকৰণৰ ছাত্ৰ-ছাত্ৰীয়ে দেওবাৰে প্ৰতিবাদ সাব্যস্ত কৰে। প্ৰতিবাদকাৰীসকলে চানুৰ নিষিদ্ধ সন্দৰ্ভত আন্তঃৰাষ্ট্ৰীয় ভাৰোত্তোলক সংস্থাক অনতি পলমে স্থিতি স্পষ্ট কৰিবলৈ দাবী জনায়।
মহিলা সংগঠনৰ প্ৰতিনিধি এম শান্তিয়ে সঞ্জীতা চানুৰ ড’প টেষ্টৰ সত্য সত্যতা সন্দৰ্ভত প্ৰশ্ন উত্থাপন কৰি তেওঁৰ ওপৰত জাৰি কৰা নিষেধাজ্ঞাৰ পূৰ্ণ ৰূপত বিৰোধিতা কৰে।
‘আন্তঃৰাষ্ট্ৰীয় ভাৰোত্তোলক সংস্থাৰ পৰা আমি এই সন্দৰ্ভত স্পষ্টীকৰণ দিবলৈ দাবী জনাইছো। ইয়াৰ পূৰ্বেও মণিপুৰৰ খেলুৱৈৰ ওপৰত এনেধৰণৰ ঘটনা সংঘটিত হৈছে। কিন্তু এইবাৰ আমি মনে মনে নাথাকো। ঘটনাৰ সত্যতা পোহৰলৈ নহালৈকে সঞ্জীতাৰ হৈ আমি প্ৰতিবাদ সাব্যস্ত কৰি যাম’। ৰাষ্ট্ৰীয় সংবাদ পত্ৰ ইণ্ডিয়ান এক্সপ্ৰেছত প্ৰকাশ পোৱা অনুসৰি এম শান্তিয়ে এইদৰে কয়।
উল্লেখযোগ্য যে মণিপুৰৰ মুখ্য মন্ত্ৰী এন বীৰেন সিঙেও এথলীটগৰাকীৰ সপক্ষে থিয় দি কেন্দ্ৰীয় ক্ৰীড়া মন্ত্ৰী ৰাজ্যৱৰ্ধন সিং ৰাঠোৰলৈ এখন বিশেষ পত্ৰ প্ৰেৰণ কৰি সমগ্ৰ ঘটনাটোৰ উপযুক্ত তদন্ত কৰিবলৈ কেন্দ্ৰীয় ক্ৰীড়া মন্ত্ৰীগৰাকীক বিশেষভাৱে অনুৰোধ জনাইছিল।
আনহাতে নিজকে নিৰ্দোষী বুলি দাবী কৰি সঞ্জীতা কৈছিল যে মই কোনো নিষিদ্ধ দ্ৰব্য গ্ৰহণ কৰা নাই। তেওঁৰ বিৰুদ্ধে আৰোপিত এই অভিযোগৰ বিৰুদ্ধে নেশ্যনেল ফেডাৰেশ্যনৰ সহযোগত ইতিমধ্যে প্ৰত্যাহ্বান জনাব বুলিও উল্লেখ কৰিছে।
