সমাজৰ অৰ্থনৈতিকভাৱে দুৰ্বল শ্ৰেণীৰ প্ৰয়োজনীয়তাৰ প্ৰতি লক্ষ্য ৰাখি অসম চৰকাৰে শীঘ্ৰেই এক সুলভ গৃহ নিৰ্মাণ নীতি গ্ৰহণ কৰিব। অসম চৰকাৰে চহৰাঞ্চলৰ নিম্ন আয়ৰ লোকসকলৰ (এলআইজি) আৰু অৰ্থনৈতিকভাৱে দুৰ্বল শ্ৰেণীৰ (ইডব্লিউজি)লোকসকলৰ বাবে ৮৩,০০০ গৃহ নিৰ্মাণ কৰিব।
বুধবাৰে জনতা ভৱনত অনুষ্ঠিত হোৱা ৰাজ্যিক গৃহ নিৰ্মাণ পৰিষদৰ এখন বৈঠকত প্ৰস্তাৱিত প্ৰকল্পটোৰ বিষয়ে সিদ্ধান্ত গ্ৰহণ কৰা হয়। নিম্ন আয়ৰ লোকসকলৰ বাবে সুলভ হাৰত গৃহ আৱণ্টনৰ নীতি প্ৰস্তুত কৰি সোনকালেই চূড়ান্ত কৰিবলৈ মুখ্যমন্ত্ৰী সৰ্বানন্দ সোণোৱালে নগৰ উন্নয়ন বিভাগক নিৰ্দেশ দিয়ে।
মুখ্যমন্ত্ৰীয়ে লগতে অসম ৰাজ্যিক গৃহ নিৰ্মাণ পৰিষদক নিৰ্দিষ্ট সময়ৰ ভিতৰত ইয়াৰ সম্পদসমূহৰ জৰীপ সম্পূৰ্ণ কৰা আৰু সেইবোৰৰ মূল্য নিৰূপণ কৰিবলৈকো নিৰ্দেশ দিছে যাতে পৰিষদে বৃহৎ প্ৰকল্প গ্ৰহণ কৰিব পাৰে।
অসম ৰাজ্যিক গৃহ নিৰ্মাণ পৰিষদৰ অধ্যক্ষ যাদব ডেকাই বৈঠকত পৰিষদৰ বৰ্তমানৰ কাৰ্যালয় চৌহদত এটা কাৰ্যালয় তথা বাণিজ্যিক ভৱন নিৰ্মাণৰ এক প্ৰস্তাৱিত প্ৰকল্পৰ ৰূপৰেখা দাঙি ধৰে যিটো মহানগৰীত এটা চকুত লগা অট্টালিকা হিচাপে গঢ়ি তোলা হ’ব। ভাৰত চৰকাৰৰ এটি সংস্থা মেকন লিমিটেডে প্ৰকল্পটোৰ ডিজাইন কৰিছে আৰু ইয়াৰ দ্বাৰা পৰিষদৰ ৰাজহ সৃষ্টি কৰা আৰু ইয়াক স্বাৱলম্বী কৰি তোলাৰ প্ৰস্তাৱ আগবঢ়াইছে।
