যোৱা ২৩ জুন তাৰিখে ডিটেনশ্যন কেম্পলৈ পঠোৱা অন্ন বালা ৰয়ক আজি মুক্তি দিয়া হয়। চল্লিশ বছৰ বয়সীয়া এইগৰাকী মহিলাই নিজৰ নাগৰিকত্বৰ প্ৰমাণ সম্বলিত নথি-পত্ৰ ন্যায়ালয়ত দেখুৱাব নোৱাৰাত তেওঁক বিদেশী নাগৰিক বুলি গ্ৰেপ্তাৰ কৰি ডিটেনশ্যন কেম্পলৈকে প্ৰেৰণ কৰা হৈছিল।
কালি চিৰাং জিলাৰ পুব অংকোৰবাৰী নিবাসী এই মহিলাগৰাকীৰ স্বামীয়ে মহিলাগৰাকীৰ ভাৰতীয় নাগৰিকত্বৰ প্ৰমাণপত্ৰ সম্বলিত নথিপত্ৰ বিদেশী ন্যায়াধিকৰণখনত দাখিল কৰাৰ পাছত বিদেশী ন্যায়াধিকৰখনেণে তেওঁ আজি মুক্তি দিয়াৰ নিৰ্দেশ দিছিল।
লগতে বিদেশী ন্যায়াধিকৰণখনে লগতে অন্ন বালা ৰয়ক শুকুৰবাৰ বা তাৰ আগতে ন্যায়াধিকৰণত নাগৰিকত্বৰ প্ৰমাণপত্ৰ সম্বলিত তথ্যসহ হাজিৰ হ’বলৈ নিৰ্দেশ দিয়ে।
৫টা দিনত ধাৰাবাহিকভাৱে নাগৰিকত্ব প্ৰমাণৰ বাবে প্ৰয়োজনীয় নথি-পত্ৰ লৈ ন্যায়ালয়ত হাজিৰ হোৱাত ব্যৰ্থ হোৱা বাবেই খিলঞ্জীয়া হোৱা সত্তেও অন্ন বালা ৰয়ক ন্যায়াধিকৰণখনে জানুৱাৰিৰ ২ তাৰিখে বিদেশী নাগৰিক বুলি ঘোষণা কৰিছিল।
ন্যায়াধিকৰণখনে ২০১৭ৰ অক্টোবৰত তেওঁৰ নাগৰিকত্ব প্ৰমাণৰ বাবে তেওঁলৈ জাননী প্ৰেৰণ কৰিছিল আৰু তেওঁ তাত ব্যৰ্থ হৈছিল। তাৰ পাছত আৰক্ষীয়ে তেওঁক গ্ৰেপ্তাৰ কৰিছিল আৰু কোকৰাঝাৰৰ ডিটেনশ্যন কেম্পলৈ প্ৰেৰণ কৰিছিল।
সদৌ অসম কোচ ৰাজবংশী ছাত্ৰ সন্থাই তেওঁৰ মুক্তি বিচাৰি প্ৰতিবাদী কাৰ্যসূচী ৰূপায়ণ কৰিছিল।
আক্ৰাছুৰ সম্পাদক গোকুল বৰ্মনে অন্ন বালা ৰয়ৰ গ্ৰেপ্তাৰ কৰি ডিটেনশ্যন কেম্পলৈ প্ৰেৰণ আৰু খিলঞ্জীয়া লোকক ডি ভোটাৰ সজোৱাৰ এটা ষড়যন্ত্ৰ বুলি অভিহিত কৰিছিল।
তেওঁ খিলঞ্জীয়া লোকক হাৰাশাস্তি কৰাটো বন্ধ কৰাৰ বাবে চৰকাৰক আহ্বান জনাইছিল।
সদৌ অসম কোচ ৰাজবংশী ছাত্ৰ সন্থাৰ উপদেষ্টা হিতেশ্বৰ বৰ্মনে কৈছিল যে অন্ন বালা ৰয় হৈছে চৰকাৰে ডি ভোটাৰ সজোৱা সম্প্ৰদায়টোৰ দ্বিতীয়টো উদাহৰণ।
তেওঁ আৰু কয়, ‘‘আমি এই ভূমিৰ খিলঞ্জীয়া বাসিন্দা আৰু আমাক হাৰাশাস্তি কৰা অনুচিত।
