সোমবাৰে ইটানগৰত অনুষ্ঠিত হৈ যায় অৰুণাচল অলিম্পিক এছ’চিয়েশ্যনৰ বাৰ্ষিক সাধাৰণ সভা। সভাত সন্থাটোৱে ৰাজধানী চহৰত নিৰ্মীয়মান ইণ্ডোৰ ষ্টেডিয়াম সমূহৰ কাম কাজ নিৰ্ধাৰিত সময়তকৈ আগতে সম্পূৰ্ণ হোৱাৰ বাবে জোৰ প্ৰদান কৰাৰ সিদ্ধান্ত গ্ৰহণ কৰে।
এই বৈঠকত সন্থাটোৱে চৰকাৰক প্ৰেৰণ কৰিবলগীয়া ক্ৰীড়া ক্ষেত্ৰৰ সমস্যাৱলীৰ লগতে বিভিন্ন প্ৰস্তাৱ সম্পৰ্কত বিশদভাৱে আলোচনা কৰা হয়।
বৈঠকত মূলতঃ স্পোৰ্টছ অথৰিটী অৱ অৰুণাচলৰ অধ্যক্ষ তথা উপাধ্যক্ষৰ পদত খেল পৃষ্ঠভূমিৰ লগত জড়িত থকা কোনো ব্যক্তিক নিয়োগ কৰা, চৰকাৰী চাকৰিত ক্ৰীড়াৰ বাবে সংৰক্ষিত পদ সমূহত শিক্ষাগত অৰ্হতা হ্ৰাস কৰা, ৰাজ্য চৰকাৰে বছৰি অৰুণাচল অলিম্পিক এছ’চিয়েশ্যনক প্ৰদান কৰি অহা ১ কোটি টকাৰ বিপৰীতে বছৰি ২.৫ কোটি প্ৰদান কৰা আদি বিষয়ত গভীৰ আলোচনা কৰে।
ইফালে সভাত উপস্থিত থকা অধিকাংশই কয় যে ক্ৰীড়া ক্ষেত্ৰৰ লগত জড়িত নথকা তথা ক্ৰীড়া সম্পৰ্কে সম্পূৰ্ণ জ্ঞান নথকা ব্যক্তিয়ে স্পোৰ্টছ অথৰিটী অৱ অৰুণাচলৰ বিষয়বাব ল’লে ৰাজ্যৰ ক্ৰীড়া ক্ষেত্ৰৰ উন্নয়ন সম্ভৱ নহয়।
অৰুণাচল অলিম্পিক এছ’চিয়েশ্যনৰ বাৰ্ষিক সাধাৰণ সভাতে স্পোৰ্টছ অথৰিটী অৱ অৰুণাচলৰ প্ৰাক্তন উপাধ্যক্ষ গেছী ড’কে সম্পৰ্কতো আলোচনা কৰা হয়।
উল্লেখ্য যে অৰুণাচলৰ ক্ৰীড়া ক্ষেত্ৰত আটাইতকৈ দীৰ্ঘকাল জড়িত হৈ থকা ব্যক্তি জনেই হৈছে ড’কে। স্পোৰ্টছ অথৰিটী অৱ অৰুণাচলৰ উপাধ্যক্ষৰ পদত নিয়োজিত হোৱাৰ পূৰ্বে ড’কে একেৰাহে ২৫ বছৰ কাল অৰুণাচল প্ৰদেশ ফুটবল এছ’চিয়েশ্যনৰ সাধাৰণ সম্পাদক হিচাপে কাৰ্যনিৰ্বাহ কৰিছিল।
বাৰ্ষিক সাধাৰণ সভাখনত ৰাজ্যখনৰ বিভিন্ন জিলা সমূহৰ সভাপতি সম্পাদককে ধৰি ৰাজ্যিক পৰ্যায়ৰ ক্ৰীড়া সংগঠন সমূহৰ প্ৰতিনিধি সকল উপস্থিত থাকে।
