অসমত পঞ্চায়ত নিৰ্বাচন অনুষ্ঠিত হোৱাৰ সময় চমু চাপি অহাৰ মাজতে স্বাস্থ্য বিভাগত হোৱা ভুৱা নিযুক্তিক লৈ তোল পাৰ হৈ উঠিছে ৰাজ্য। এইবাৰ স্বাস্থ্য বিভাগৰ বিৰুদ্ধে গৰজি উঠিছে দুৰ্নীতি বিৰোধী যুৱ শক্তি, অসম নামৰ সংগঠনটো।
ৰাজ্যখনত নতুনকৈ গঢ় লৈ উঠা সংগঠনটোৱে স্বাস্থ্য বিভাগৰ নিযুক্তিৰ ক্ষেত্ৰত হোৱা ব্যাপক কেলেংকাৰীৰ বিষয়ে সৰৱ হৈ পৰিছে |
স্বাস্থ্য বিভাগত নিযুক্তি দিয়া ৫১৩ গৰাকী ব্যক্তিক আঁতৰোৱা হৈছে আৰু আইনগত ব্যৱস্থা ল’বলৈ সংশ্লিষ্ট যুটীয়া স্বাস্থ্য সেৱা সঞ্চালক সকলক নিৰ্দেশ দিয়া হৈছে। কিন্তু শেহতীয়াকৈ চাকৰিৰ পৰা আঁতৰোৱা ব্যক্তিসকলৰ সংখ্যাৰ খেলি মেলি আছে বুলি অভিযোগ উঠিছে।
স্বাস্থ্যমন্ত্ৰী হিমন্ত বিশ্ব শৰ্মাই সদনত ৫১৩ গৰাকী ব্যক্তিক চাকৰিৰ পৰা আঁতৰোৱা হৈছে বুলি সদনত উল্লেখ কৰাৰ বিপৰীতে বিভাগীয়ভাৱে ৫৫৪ গৰাকী ব্যক্তিক চাকৰিৰ পৰা নিলম্বিত কৰা হৈছে বুলি ইতিমধ্যে সংবাদ মাধম্যত প্ৰকাশ পাইছে ৷
উক্ত ভুৱা নিযুক্তি লাভ কৰা সকলক নিলম্বিত কৰাৰ ক্ষেত্ৰতো স্বজন প্ৰীতিৰ অভিযোগ উঠিছে ৷ নিলম্বিত কৰা সকলৰ তালিকাত বিশেষ অঞ্চলত নিযুক্তি লাভ কৰা সকলক নিলম্বিত কৰা হৈছে যদিও তালিকাত নাম নাই নিৰ্বাচিত অঞ্চলত ভুৱা নিযুক্তি লাভ কৰি চাকৰি কৰি থকা সকলৰ নাম।
ভুৱা নিযুক্তি দিয়াত সহায় কৰা দালালক চিনাক্ত কৰি আৰক্ষী থানাত গোচৰ দিয়াৰ পিছতো ৰহস্যজনকভাৱে আৰক্ষীয়ে দালাল পক্ষক সহায় কৰাৰ অভিযোগ উত্থাপন হৈছে।
বিশ্বনাথত দেওবাৰে আয়োজন কৰা সংবাদমেলত দুৰ্নীতি বিৰোধী যুৱ শক্তি অসমে এই বিষয়ে কেতবোৰ তথ্য সংবাদ মাধ্যমৰ আগত দাঙি ধৰে। উক্ত সংবাদ মেলত সংগঠনটোৰ বিষয়ববীয়াসকলে ইয়াৰ পূৰ্বে নিযুক্তিৰ ক্ষেত্ৰত হোৱা কেলেংকাৰী সন্দৰ্ভত তথ্য ফাদিলৰ পৰা বিৰত থাকি উৎকোচ দিয়াৰ প্ৰচেষ্টা চলোৱাৰ লগতে প্ৰাণে মৰাৰ ভাবুকি দি অহাৰ কথাও সদৰি কৰে।
তদুপৰি সংগঠনটোৱে অতি সোনকালে এই সন্দৰ্ভত আদালতত ৰাজহুৱা স্বাৰ্থজনিত আৱেদন দাখিল কৰাৰ সিদ্ধান্তৰ কথাও প্ৰকাশ কৰে |
