২০১৮ চনৰ হাইস্কুল শিক্ষান্ত পৰীক্ষাত পূৰ্বৰ ধাৰাবাহিকতা বজাই ৰাখি ৭৯.৭৬ শতাংশৰ উত্তীৰ্ণৰ হাৰেৰে শীৰ্ষস্থান দখল কৰিবলৈ সক্ষম হৈছে বান বিধ্বস্ত ধেমাজি জিলাই। আজি জনতা ভৱনত আয়োজিত এখন সংবাদ মেলত ৰাজ্যৰ শিক্ষা মন্ত্ৰী সিদ্ধাৰ্থ ভট্টাচাৰ্যই এই কথা জানিব দিয়ে।
এইবাৰৰ হাইস্কুল শিক্ষান্ত পৰীক্ষাত ধেমাজি জিলাৰ সৰ্বমুঠ ১২,৫৮৭ গৰাকী পৰীক্ষাৰ্থীয়ে পৰীক্ষাত অৱতীৰ্ণ হৈছিল। ইয়াৰ ভিতৰত ১০,০৩৯ জনে সুখ্যাতিৰে সফলতা অৰ্জন কৰে। ইয়াৰে প্ৰথম বিভাগত উত্তীৰ্ণ হয় ২,৩৩৬ গৰাকী, দ্বিতীয় বিভাগত ৪৭৭৪ গৰাকী আৰু তৃতীয় বিভাগত উত্তীৰ্ণ হয় ২৯২৯ গৰাকী পৰীক্ষাৰ্থী।
আনহাতে ধেমাজিৰ পাছতে ৬৯.৮৫ শতাংশ উত্তীৰ্ণৰ হাৰেৰে দ্বিতীয় স্থান লাভ কৰিছে নলবাৰী জিলাই। জিলাখনত ১০,০১২ গৰাকী পৰীক্ষাৰ্থীৰ বিপৰীতে উত্তীৰ্ণ হয় ৬৯৯৩ গৰাকী পৰীক্ষাৰ্থী। ইয়াৰে প্ৰথম বিভাগত উত্তীৰ্ণ হয় ২৭৫৬ গৰাকী, দ্বিতীয় বিভাগত ৩০২২ গৰাকী আৰু তৃতীয় বিভাগত উত্তীৰ্ণ হয় ১২১৫ গৰাকী।
ইফালে ৬৭.১৫ শতাংশ উত্তীৰ্ণৰ হাৰেৰে তৃতীয় স্থানত আছে কামৰূপ মহানগৰ জিলা। জিলাখনৰ ১২,৩০০ গৰাকী পৰীক্ষাৰ্থীৰ বিপৰীতে উত্তীৰ্ণ হয় ৮২৬০ গৰাকী পৰীক্ষাৰ্থী। প্ৰথম বিভাগত ৩৮৮৯ গৰাকী, দ্বিতীয় বিভাগত ৩২৪২ গৰাকী আৰু তৃতীয় বিভাগত ১১২৯ গৰাকী পৰীক্ষাৰ্থী উত্তীৰ্ণ হয়।
উল্লেখ্য যে ২০১৮ বৰ্ষৰ হাইস্কুল শিক্ষান্ত পৰীক্ষাত ৩৬.৯৭ শতাংশৰে সৰ্বনিম্ন ফলাফল প্ৰদৰ্শন কৰে ওদালগুৰি জিলাই।
