হাতী-মানুহৰ সম্প্ৰীতি : আঘাতপ্ৰাপ্ত এটা বনৰীয়া হাতীক জীয়াই ৰাখিছে স্থানীয় লোকৰ মৰম-শুশ্ৰূষাই

হাতী-মানুহৰ সংঘাত নহয়, সম্প্ৰীতিয়ে দৃষ্টি কাঢ়িছে প্ৰকৃতিপ্ৰেমীৰ। এই দৃষ্টান্ত পোৱা গৈছে মহানগৰীৰ কাষৰে এটা অঞ্চলত। জানিব পৰামতে, গুৱাহাটী মহানগৰীৰ দাঁতিতে লাগি থকা গড়ভঙা বনাঞ্চলত এটা বনৰীয়া হাতীয়ে যন্ত্ৰণাত চটফটাই আছে আজি ভালেমান দিনৰ পৰা। আগফালৰ সোঁভৰিত ডাঙৰ পকা ঘা এটুকুৰা লৈ হাতীটো অসহায় অৱস্থাত প্ৰায় পাঁচ-ছদিন ধৰি একেঠাইতে আছে। মাত্ৰ স্থানীয় লোকৰ মৰম আৰু শুশ্ৰূষাই তাক জীয়াই ৰাখিছে। চলি আছে বন বিভাগৰ তদাৰক আৰু নিয়মীয়া শুশ্ৰূষাও।

বন বিভাগৰ সূত্ৰই নৰ্থ-ইষ্ট নাওক জনোৱামতে, যোৱা কেইদিনমানৰ আগত হাতীটোক বনাঞ্চলৰ দাঁতিত এপাল হাতীৰ সৈতে দেখা গৈছিল। কিন্তু পালটোৰ দলপতি দঁতাল হাতীৰ দ্বাৰা সি প্ৰায়ে খেদা খোৱা দেখিছিল বন বিভাগৰ লোকে।

বন বিভাগৰ লোকে জনোৱামতে, হাতীটোৰ ভৰিৰ ডাঙৰ ঘাডোখৰৰ কাৰণ দঁতাৰ হাতীৰ খোঁচো হ’ব পাৰে।

আনহাতে স্থানীয় লোকে নিয়মীয়াকৈ খাদ্যৰ যোগান ধৰি আছে হাতীটোক। বন বিভাগৰ লোকেও দূৰৰ পৰাই ৰিম’ট পদ্ধতিৰে বেজী-ঔষধ আদি নিয়মীয়াকৈ দি থকা বুলি জনাইছে বনবিভাগৰ লোকে।

উল্লেখযোগ্য যে বিগত সময়ত ৰাজ্যখনত কেইবাটাও আঘাতপ্ৰাপ্ত হাতী সময়ত আৰু উপযুক্ত ধৰণৰ চিকিৎসাৰ অভাৱত মৃত্যুমুখত পৰিছে।