হাফলঙত হ’ম গাৰ্ড নিযুক্তিত ব্যাপক দুৰ্নীতি হোৱাৰ তথ্য পোহৰলৈ আহিছে। ভুৱা প্ৰমাণপত্ৰ বনাই নিযুক্তিত জড়িত হাফলঙৰ ট্ৰেজাৰি কাৰ্যালয়ত কৰ্তব্যৰত হ’ম গাৰ্ড বিতোপন বৰাক আজি এই অভিযোগত আৰক্ষীয়ে আটক কৰিছে। বিতোপনৰ পৰা আৰক্ষীয়ে এটা ৰাউণ্ড ছীল আৰু হ’ম গাৰ্ডৰ ডিষ্ট্ৰিক্ট কমাণ্ডেণ্টৰ চাৰিটা ভুৱা ছীল উদ্ধাৰ কৰিছে।
বিতোপনৰ লগত ৰঞ্জিত কোঁৱৰ নামৰ দিয়ুংমুখ আৰক্ষী থানাত কৰ্তব্যৰত হ’ম গাৰ্ড এজনো জড়িত বুলি বিতোপনে আৰক্ষীৰ আগত স্বীকাৰোক্তি দিছে। জানিব পৰামতে, বিতোপনৰ ঘৰ নগাঁও জিলাত। আনহাতে ৰঞ্জিতৰ ঘৰ মৰিগাঁৱত।
তথ্য অনুসৰি বিতোপন, ৰঞ্জিত আৰু এগৰাকী আৰক্ষী কনিষ্টবল মিলি ভুৱা প্ৰমাণপত্ৰৰে হ’ম গাৰ্ডত ইতিপূৰ্বে দহজন যুবকক নিযুক্তি দিবলৈ সক্ষম হৈছিল বিতোপন আৰু ৰঞ্জিতে। অভিযোগ মতে, ইয়াৰ বিনিময়ত যুৱককেইজনৰ পৰা পঞ্চাচ হাজাৰকৈ টকাকৈ লৈছে বিতোপন আৰু ৰঞ্জিতে।
এই যুৱকসকলে ভুৱা প্ৰমাণ পত্ৰ লৈ আজি চাকৰিত যোগদানৰ কাৰণ আহোতে বিষয়টো দৃষ্টি গোচৰ হয় হ’ম গাৰ্ডৰ ডিমা হাচাও জিলাৰ ডিষ্ট্ৰিক্ট কমাণ্ডেণ্টৰ। আৰক্ষীক বিষয়টো অৱগত কৰাৰ লগে লগে প্ৰাথমিক তদন্ত কৰি হাফলং আৰক্ষীয়ে বিতোপনক আটক কৰে। বিতোপনক সোধা-পোছা কৰাত আচল তথ্য পোহৰলৈ আহে।
আৰক্ষীয়ে জনোৱা মতে, বিতোপনে টকা লোৱাৰ কথা স্বীকাৰ কৰাৰ লগতে গোটেই কাম-কাজ দিয়ুংমুখত হোৱা বুলি কয়। আনহাতে নকল ছীলবিলাক লংকাত বনাই অনা বুলিও জানিবলৈ দিয়ে।
নৰ্থ-ইষ্ট নাওক হাফলং আৰক্ষী থানাৰ অ’ চি কুশেশ্বৰ বৰাই কয় যে এই জালিয়াতি কাৰ্যৰ আঁৰত ডাঙৰ চক্ৰ জড়িত থাকিব পাৰে।
আনহাতে ভুৱা প্ৰমাণপত্ৰৰে হ’মগাৰ্ডৰ চাকৰিত যোগদানৰ কাৰণে অহা কাৰ্বি আংলং জিলাৰ হাৱাইপুৰৰ দুগৰাকী যুবকৰ লগতে দিয়ুংব্ৰা আৰু দিয়ুংমুখৰ মুঠ দহজন যুৱককো আটক কৰিছে আৰক্ষীয়ে।
ইয়াৰে জয়কুমাৰ জহৰীয়ে দিয়া ভাষ্য অনুসৰি তেওঁ এই চাকৰিৰ কাৰণে ৰঞ্জিত কোঁৱৰক মাটি বন্ধক দি পঞ্চাচ হাজাৰ টকা যোগাৰ কৰিছিল। ঠিক একেদৰে মহাজিত কেম্প্ৰাই আৰু চাজিত লাংথাচায়ো মাটি বিক্ৰী কৰি ৰঞ্জিতক পঞ্চাচ হাজাৰ টকা চাকৰিৰ বাবে দিছিল।
