হাফলঙত ৰাষ্ট্ৰীয় নাগৰিকপঞ্জীক লৈ নাগৰিক সভাৰ আয়োজন প্ৰশাসনৰ
ৰাষ্ট্ৰীয় নাগৰিকপঞ্জী উন্নীতকৰণ লৈ বুধবাৰে হাফলঙৰ আৱৰ্ত ভবনত জিলা প্ৰশাসনৰ আহ্বানত এক জৰুৰী বৈঠক অনুষ্ঠিত হয়। এই বৈঠকত জিলা প্ৰশাসনৰ লগতে পাৰ্বত্য পৰিষদৰ শীৰ্ষস্থানীয় বিষয়া আৰু বিভিন্ন দল সংগঠনৰ প্ৰতিনিধিসকল উপস্থিত থাকে।
বৈঠকত জিলা উপায়ুক্ত অমিতাভ ৰাজখোৱাই ৰাষ্ট্ৰীয় নাগৰিকপঞ্জী উন্নীকৰণৰ ওপৰত বক্তব্য আগবঢ়োৱাৰ লগতে অহা জুন মাহৰ ৩০ তাৰিখে প্ৰকাশ পাবলগীয়া ৰাষ্ট্ৰীয় নাগৰিকপঞ্জীৰ চূড়ান্ত তালিকাক কেন্দ্ৰ কৰি যাতে তেনে কোনো অপ্ৰীতিকৰ পৰিস্থিতিৰ সৃষ্টি নহয় তাৰ সেই ক্ষেত্ৰত ৰাইজক সজাগ থকাৰ বাবে আহ্বান জনায়।
বৈঠকত জিলা উপায়ুক্তৰ বাহিৰেও উত্তৰ কাছাৰ পাৰ্বত্য স্বায়ত্ত শাসিত পৰিষদৰ নৰ্মাল বিভাগৰ প্ৰধান সচিব মুকুট কেম্প্ৰাই, অতিৰিক্ত আৰক্ষী অধীক্ষক পুষ্পৰাজ সিং, প্ৰশান্ত দত্ত, অতিৰিক্ত জিলা উপায়ুক্ত ভাস্কৰ দেবশৰ্মা, ৪৩আছাম ৰাইফলছৰ কমাণ্ডিং অফিচাৰ গগন পাণ্ডে, জেএনএইচ্ছৰ সভাপতি কল্যাণ দাওলাগুপু, বিশিষ্ট নাগৰিক বহিমচন্দ্ৰ লাংথাছাৰ লগতে চৰকাৰী বিষয়ববীয়া, ছাত্ৰ সংগঠনৰ প্ৰতিনিধিসকল উপস্থিত থাকে।
বৈঠকত উপস্থিত থকা প্ৰত্যেকেই নিজৰ নিজৰ মন্তব্য দাঙি ধৰি প্ৰশাসনক সহায় সহযোগ কৰাৰ আশ্বাস প্ৰদান কৰে।
জিলা উপায়ুক্ত অমিতাভ ৰাজখোৱাই কয় যে ডিমা হাচাও জিলাত ৰাষ্ট্ৰীয় নাগৰিকপঞ্জী উন্নীতকৰণক লৈ ইয়াৰ আগতেও কোনো বেয়া পৰিস্থিতিৰ সৃষ্টি হোৱা নাই আৰু অহা দিনতো তেনে পৰিস্থিতিৰ উদ্ভৱ নহ’ব। তথাপি নাগৰিকপঞ্জীক কেন্দ্ৰ কৰি যাতে ভুল বুজাবুজিৰ সৃষ্টি নহয় তাৰ কাৰণে ৰাইজক সজাগ থকাৰ পৰামৰ্শ দিয়া হয়।
উপায়ুক্ত অমিতাভ ৰাজখোৱাই আৰু কয় যে ডিমা হাচাওত ৬০শতাংশৰো অধিক নাগৰিকৰ নাম প্ৰথমখন তালিকাত অন্তৰ্ভুক্ত হৈছে।গতিকে ৩০ জুনত প্ৰকাশ পাবলগীয়া চূড়ান্ত তালিকাখনত কোনো বৈধ ভাৰতীয় নাগৰিকৰ নাম বাদ পৰিলে তেওঁ ৩০ জুনৰ পাছত নতুনকৈ অন্তৰ্ভুক্ত কৰাৰ কাৰণে আবেদন কৰাৰ সুযোগ লাভ কৰিব।