হৃদ ৰোগত আক্ৰান্ত হৈ বিশিষ্ট সাংবাদিক সীমান্ত ভাগৱতীৰ দেহাৱসান
হৃদ ৰোগত আক্ৰান্ত হৈ গুৱাহাটীৰ জি এন আৰ চিত চিকিৎসাধীন হৈ থকা বিশিষ্ট সাংবাদিক তথা ‘দ্যা আসাম ট্ৰিবিউন’ কাকতৰ জ্যেষ্ঠ উপ সম্পাদক সীমান্ত ভাগৱতীয়ে আজি পুৱা মৃত্যুক সাবটি লয়।
উল্লেখযোগ্য যে যোৱা বৃহস্পতিবাৰে মহানগৰীৰ ইণ্ডিয়া ক্লাবত টেনিছ খেলি থকা অৱস্থাত ষ্ট্ৰ’কত আক্ৰান্ত হোৱা ভাগৱতীক ততাতয়াকৈ এম এম চি হাস্পাতালত ভৰ্তি কৰোৱা হৈছিল।
পিছত তেওঁৰ অৱস্থা গুৰুতৰ হোৱা দেখি জি এম চি এইছলৈ লৈ যোৱা হয় যদিও তাত আই চি ইউত আসন নোপোৱাত তেওঁক সংকটজনক অৱস্থাত দিচপুৰস্থিত জি এন আৰ চিত ভৰ্তি কৰোৱা হয়। ইয়াতে সাংবাদিক গৰাকীয়ে আজি অন্তিম নিশ্বাস এৰে।
আনহাতে বিশিষ্ট সাংবাদিক গৰাকীৰ মৃত্যুত মুখ্য মন্ত্ৰী সৰ্বানন্দ সোণোৱালে গভীৰ শোক প্ৰকাশ কৰিছে।
সংবাদ মাধ্যমলৈ প্ৰেৰণ কৰা এক শোকবাৰ্তাত কয় যে আসাম আসাম ট্ৰিবিউনৰ উপৰি নিবন্ধকাৰ হিচাপে অসমৰ সংবাদ জগতলৈ তেওঁ আগবঢ়োৱা বিশিষ্ট অৱদানক ৰাজ্যখনৰ জনসাধাৰণে শ্ৰদ্ধাৰে স্মৰণ কৰিব।
ভাগৱতীৰ বিয়োগ ৰাজ্যৰ সংবাদ জগতৰ বাবে এক অপুৰণীয় ক্ষতি বুলি উল্লেখ কৰি তেওঁ সাংবাদিক গৰাকীৰ শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে।
তদুপৰি জ্যেষ্ঠ সাংবাদিক গৰাকীৰ মৃত্যু সংবাদ জগতৰ লগতে ক্ৰীড়াজগতৰ বাবেও এক বৃহৎ ক্ষতি বুলি উল্লেখ কৰি মুখ্য মন্ত্ৰীৰ মিডিয়া উপদেষ্টা হৃষীকেশ গোস্বামীয়ে প্ৰয়াত ভাগৱতীৰ পৰিয়াললৈ সমবেদনা জ্ঞাপন কৰে।