হোজাইৰ গান্ধী বিদ্যাপীঠৰ অবসৰপ্ৰাপ্ত প্ৰধান শিক্ষক বাবুৰাম চৌহানৰ দেওবাৰে দেহাৱসান হৈছে। হোজাইৰ ৰামপুৰত থকা নিজা বাসভৱনত অৱসৰপ্ৰাপ্ত শিক্ষকজনৰ দেহাৱসান হৈছে বুলি জানিব পৰা গৈছে। মৃত্যুৰ সময়ত তেখেতৰ বয়স হৈছিল ৭৩ বছৰ। তেওঁ কেইদিন মানৰ পৰা অসুখত ভুগি আছিল বুলি পৰিয়ালৰ সূত্ৰত প্ৰকাশ।
তেখেতে হিন্দী আৰু ৰাজনীতি বিজ্ঞানত স্নাতকোত্তৰ ডিগ্ৰী লাভ কৰিছিল। প্ৰায় তিনিটা দশক ধৰি বিদ্যালয়খনত শিক্ষক হিচাপে সেৱা আগবঢ়াই তেখেতে ২০০৯ চনৰ ২৮ ফেব্ৰুৱাৰিত বিদ্যালয়খনৰ প্ৰধান শিক্ষক হিচাপে অৱসৰ গ্ৰহণ কৰিছিল। তেওঁ হিন্দী বিষয়ৰ পাঠদান কৰিছিল।
তেখেতৰ ছাত্ৰ ড০ মনোজ কুমাৰ স্বামী, ড০ যুৱৰাজ গিৰি, ৰমেশ মুন্দ্ৰা, ৰাজকুমাৰ গুপ্তা, মুকেশ সিং, শিৱকুমাৰ পাণ্ডে, প্ৰবীন ছেৰাউগী, অখিলেশ মাহেশ্বৰীৰ মতে চৌহান ছাৰ সহজ সৰল আৰু উৎসাহী প্ৰকৃতিৰ আছিল। সমাজৰ উন্নতিৰ হকে কাম কৰি যাবলৈ তেখেতে সকলোকে উৎসাহিত কৰিছিল বুলি তেখেতৰ ছাত্ৰসকলে প্ৰকাশ কৰিছে।
মৃত্যুৰ সময়ত তেখেতে ইহসংসাৰত তেখেতৰ পত্নী, ৪জন পুত্ৰ, ৪গৰাকী কন্যা আৰু আত্মীয়-স্বজন আৰু অসংখ্য গুণমুগ্ধক এৰি থৈ যায়। আজি তেওঁৰ শেষকৃত্য তেখেতৰ জন্মস্থান হোজাইৰ হাৱাইপুৰত সম্পন্ন কৰা হয়।
