১৩ অনূৰ্ধ্ব ফুটবলৰ প্ৰথম দিনাই তামুলপুৰে ২-০ৰ ব্যৱধানত পৰাস্ত কৰিলে ঘৰুৱা দল মঙলদৈক
অসম ফুটবল সংস্থাৰ উদ্যোগত বৃহস্পতিবাৰৰ পৰা মঙলদৈ ষ্টেডিয়ামত আৰম্ভ হৈছে ১৩ বছৰ অনূৰ্ধ্ব সুজিত নাৰ্জাৰী ট্ৰফী ফুটবল প্ৰতিযোগিতা। প্ৰতিযোগিতাখনৰ শুভ উদ্বোধন কৰে ইণ্ডিয়ান ছুপাৰ লীগৰ মুম্বাই এফ চিৰ খেলুৱৈ প্ৰাঞ্জল ভূমিজে।
প্ৰতিযোগিতাৰ উদ্বোধনী মেচত তামুলপুৰ জিলাই আয়োজক দল মঙলদৈক ২-০ গ’লৰ ব্যৱধানত পৰাস্ত কৰি পৰৱৰ্তী ৰাউণ্ডলৈ অগ্ৰসৰ হয়।
বিজয়ী দল তামুলপুৰৰ হৈ অভিজিৎ বড়োয়ো ১০ মিনিটত আৰু বিৰাজ স্বৰ্গীয়াৰীয়ে ২২ মিনিটত কৰা গ’লৰ বাবেই প্ৰত্যাশিত বিজয় নিশ্চিত কৰে। মেচখন পৰিচালনা কৰে আফজল বৰভূঞাই।
উল্লেখ্য যে প্ৰতিযোগিতাখনৰ উদ্বোধনী অনুষ্ঠানৰ সময়ত অসমৰ প্ৰতিভাৱান ফুটবলাৰ প্ৰাঞ্জল ভূমিজৰ উপৰি অসম ফুটবল এছ’চিয়েশ্যনৰ সহকাৰী সম্পাদক প্ৰণিল দৈমাৰী, মঙলদৈ স্প’ৰ্টছ এছ’চিয়েশ্যনৰ বিষববীয়াৰ লগতে বহুতো বিশিষ্ট ব্যক্তি উপস্থিত থাকে।
উল্লেখযোগ্য যে মঙলদৈত আয়োজিত এই প্ৰতিযোগিতাখনৰ মেচসমূহ দুটা গ্ৰুপত ভাগ কৰা হৈছে বুলি আয়োজকে জানিবলৈ দিয়ে।