১৬ মে’ৰ পৰা নাগৰিকত্ব বিধেয়কৰ বিৰুদ্ধে ৰাজ্যজোৰা আন্দোলনৰ ঘোষণা যুৱ-ছাত্ৰ পৰিষদৰ

হিন্দু বাংলাদেশীক অসমত সংস্থাপিত কৰাৰ বাবে কেন্দ্ৰীয় চৰকাৰে উত্থাপন কৰা নাগৰিকত্ব সংশোধনী বিধেয়কৰ বিৰুদ্ধে এইবাৰ ৰাজ্যজোৰা আন্দোলনৰ কাৰ্যসূচী ঘোষণা কৰিছে অসম জাতীয়তাবাদী যুৱ-ছাত্ৰ পৰিষদে।

প্ৰস্তাৱিত বিধেয়কখনৰ বিৰুদ্ধে অহা ১৬ মে’ৰ পৰা ৰাজ্যৰ প্ৰতিখন জিলাতে প্ৰতিবাদী সমদল উলিয়াই বিধেয়কখন বাতিলৰ দাবী জনাব যুৱ ছাত্ৰ পৰিষদে।

তদুপৰি, ৰাজ্যখনৰ প্ৰতিখন জিলাৰে আঞ্চলিক আৰু শাখা সমিতিসমূহে এই সময়ছোৱাত মটৰচাইকেল ৰেলী, পথ সভা, প্ৰচাৰ পত্ৰিকা বিতৰণ, প্ৰতিবাদী সভা আদি অনুষ্ঠিত কৰি আন্দোলন অব্যাহত ৰাখিব।

জাতীয়তাবাদী যুৱ-ছাত্ৰ পৰিষদৰ সভাপতি পুতুল দত্ত আৰু সাধাৰণ সম্পাদক পলাশ চাংমায়ে দেওবাৰে এক বিবৃতিযোগে আন্দোলনৰ এই কাৰ্যসূচী ঘোষণা কৰি কয় যে কেন্দ্ৰীয় চৰকাৰে অসমীয়া জাতিক নিঃশেষ কৰাৰ ষড়যন্ত্ৰ ৰচিছে। বিজেপিয়ে নিজৰ ৰাজনৈতিক স্বাৰ্থ সিদ্ধি তথা ভোটবেংক সৃষ্টিৰ বাবে এনে নীচ ষড়যন্ত্ৰত নমা বুলি তেওঁলোকে অভিযোগ তোলে।

আনহাতে, বিতৰ্কিত বিধেয়কখনৰ বিৰুদ্ধে ৰাজ্যজুৰি প্ৰতিবাদ হোৱাৰ পাছত মুখ্যমন্ত্ৰী সৰ্বানন্দ সোণোৱালে অসমীয়া জাতিৰ বিৰুদ্ধে কোনো কাম নকৰে বুলি কৰা মন্তব্য সন্দৰ্ভতো যুৱ-ছাত্ৰ পৰিষদে দেওবাৰে প্ৰতিক্ৰিয়া ব্যক্ত কৰিছে।

তেওঁলোকে কয় যে মুখ্যমন্ত্ৰী সৰ্বানন্দ সোণোৱালৰ যদি অসমীয়া জাতিলৈ শ্ৰদ্ধা আছে তেন্তে নাগৰিকত্ব সংশোধনী বিধেয়ক সন্দৰ্ভত মুখ্যমন্ত্ৰীয়ে চৰকাৰৰ স্থিতি স্পষ্ট ভাষাৰে অসমৰ জনতাক জনাওক।

মুখ্যমন্ত্ৰীগৰাকীয়ে যদিহে সঁচাকৈয়ে এই এই বিধেয়কখনৰ বিৰোধিতা কৰে তেন্তে বিধানসভাৰ বিশেষ অধিৱেশন অনুষ্ঠিত কৰি অথবা কেবিনেটত ইয়াৰ বিৰুদ্ধে প্ৰস্তাৱ গ্ৰহণ কৰি ৰাইজক দেখুৱাবলৈ বিবৃতিটোত জাতীয়তাবাদী যুৱ-ছাত্ৰ পৰিষদে মুখ্যমন্ত্ৰী সৰ্বানন্দ সোণোৱালক আহ্বান জনাইছে।