১৯ জুনত ধোদাঙত মাজুলী জিলা প্ৰশাসনৰ ‘জন-প্ৰশাসন’ কাৰ্যসূচী
জনসাধাৰণৰ কাষ চপাই নিয়াৰ উদ্দেশ্যে মাজুলী জিলা প্ৰশাসনে ৰূপায়ণ কৰি অহা অভিলাষী জনসংযোগী কাৰ্যসূচী ‘জন-প্ৰশাসন’ এইবাৰ ১৯ জুনত দক্ষিণ আঁহতগুৰি গাঁও পঞ্চায়ত এলেকাৰ ধোদাঙত অনুষ্ঠিত হ’ব।
ব্ৰহ্মপুত্ৰৰ দক্ষিণ পাৰে গোলাঘাট জিলাৰ সীমা সংলগ্ন ধোদাঙৰ নৱজ্যোতি হাইস্কুলত মঙলবাৰে পুৱা ৯.৩০ বজাৰ পৰা ‘জন-প্ৰশাসন’ কাৰ্যসূচী আৰম্ভ কৰা হ’ব। কাৰ্যসূচীৰ দিনা মাজুলীৰ উপায়ুক্ত দেৱপ্ৰসাদ মিশ্ৰই জিলাখনৰ ১৬টা চৰকাৰী বিভাগৰ মূৰব্বী বিষয়াৰ লগতে বেংকৰ কাৰ্যবাহীকো লগত লৈ এই কাৰ্যসূচীত ভাগ লৈ অঞ্চলবাসীৰ অভাৱ-অভিযোগৰ বুজ ল’ব।
মাজুলীৰ আৰক্ষী অধীক্ষক হীতেশ চন্দ্ৰ ৰায়, অতিৰিক্ত উপায়ুক্তদ্বয় নৰেণ দাস, চিন্ময় নাথ আৰু ৰাজহ চক্ৰ বিষয়া অজিত কুমাৰ শৰ্মাৰ লগতে তিনিগৰাকী সহকাৰী আয়ুক্তয়ো জিলা প্ৰশাসনৰ হৈ এই কাৰ্যসূচীত উপস্থিত থাকিব।
একেদৰে মাজুলী উন্নয়ন খণ্ডৰ ভাৰপ্ৰাপ্ত খণ্ড উন্নয়ন বিষয়াৰ লগতে স্বাস্থ্য, জলসম্পদ, পশুপালন তথা পশু চিকিৎসা, কৃষি তথা কৃষি অভিযান্ত্ৰিক শাখা, শিক্ষা, সমাজ কল্যাণ, জনস্বাস্থ্য কাৰিকৰী, মীন, খাদ্য আৰু অসামৰিক যোগান, ৰেচম, হস্ততাঁত আৰু বস্ত্ৰ বিভাগ, জিলা উদ্যোগ আৰু বাণিজ্য কেন্দ্ৰ, এপিডিচিএলৰ মূৰব্বীৰ সৈতে বিভাগীয় বিষয়া-কৰ্মচাৰীৰ দল আৰু বেংকৰ বিষয়াই ধোদাঙৰ জন প্ৰশাসনত অংশগ্ৰহণ কৰি ৰাইজক নিজ নিজ বিভাগৰ দ্বাৰা ৰূপায়িত আঁচনিৰ সা-সুবিধাৱলীৰ বিষয়ে অৱগত কৰিব।
তদুপৰি স্বাস্থ্য বিভাগে জন প্ৰশাসন কাৰ্যসূচীৰ অংশ হিচাপে ধোদাংবাসীৰ বাবে বিনামূলীয়া স্বাস্থ্য পৰীক্ষা শিবিৰ অনুষ্ঠিত কৰিব। একেদৰে পশু চিকিৎসা বিভাগৰ দলেও অঞ্চলটোৰ পোহনীয়া পশুধনৰ বাবে সেইদিনা বিশেষ পশু চিকিৎসা সেৱা তথা চিটা প্ৰদান কাৰ্যসূচী হাতত ল’ব।
সেইদিনাৰ জন প্ৰশাসনত মাজুলীৰ উপায়ুক্ত মিশ্ৰই বিভাগীয় মূৰব্বীসকলক ৰাইজৰ সন্মুখত লৈ গাঁও পঞ্চায়ত এলেকাটোত বিভাগসমূহে হাতত লোৱা চৰকাৰী আঁচনি সমূহৰ কাৰ্য ৰূপায়ণৰো খতিয়ান ল’ব।