মণিপুৰৰ ক্ৰীড়াপ্ৰেমীৰ বাবে আহিছে আন এক সু-খবৰ। মণিপুৰৰ জীয়ৰী টেকচাম ৰঞ্জিতা দেৱীয়ে ২০১৮ চনৰ ফিফা বিশ্ব কাপলৈ ৰেফাৰি হিচাপে নিৰ্বাচিত হৈছে। ইয়াৰ পূৰ্বেও মণিপুৰৰ জীয়ৰী কেইলিয়ানি ছানুয়ে আন্তঃৰাষ্ট্ৰীয় ফুটবলত ৰেফাৰি হিচাপে খেল পৰিচালনা কৰিছিল। ২০১৮ বিশ্বকাপলৈ যোগ্যতা অৰ্জন কৰাৰ পূৰ্বতে ৰঞ্জিতা দেৱীয়ে ৪ খন আন্তঃৰাষ্ট্ৰীয় পৰ্যায়ৰ খেলত সহযোগী তথা মূল ৰেফাৰি হিচাপে খেল পৰিচালনা কৰিছে। তৃতীয় শ্ৰেণীৰ ৰেফাৰি হিচাপেও ৫০ খনতকৈ অধিক ৰাষ্ট্ৰীয় তথা আন্তঃবিশ্ববিদ্যালয় পৰ্যায়ৰ খেলপৰিচালনা কৰাৰ অভিজ্ঞতা আহৰণ কৰিছে। মণিপুৰৰ থৌবাল জিলাৰ কংজাম অঞ্চলৰ নিবাসী দেৱী নৱম সংৰক্ষিত বেটেলিয়নত কনিষ্টবল হিচাপে কৰ্মৰত। বৰ্তমান তেওঁ মহাৰাষ্ট্ৰৰ কৌহলাপুৰত চলি থকা ভাৰতীয় মহিলা লীগত ব্যস্ত হৈ আছে। লক্ষণীয় যে বৰ্তমান সময়লৈকে ২০১৮ চনৰ ফিফা বিশ্বকাপলৈ নিৰ্বাচিত ৰঞ্জিতা হৈছে একমাত্ৰ মহিলা ৰেফাৰি। মণিপুৰ ফুটবল সংস্থা আৰু ফুটবল ৰেফাৰি কমিটিয়ে তেওঁৰ এই সাফল্যৰ বাবে শুভেচ্ছা জ্ঞাপন কৰিছে।
