অসম বিজেপিৰ বুথ সমিতিসমূহৰ এখন সভাত ভাগ লোৱাৰ বাবে অহা ২৪ মাৰ্চত গুৱাহাটীলৈ আহিব বিজেপিৰ ৰাষ্ট্ৰীয় সভাপতি অমিত শ্বাহ।
এন ই নাওক এই কথা জনাই অসম বিজেপিৰ মুখপাত্ৰ ৰূপম গোস্বামীয়ে কয়, ‘গুৱাহাটীত অহা ২৪ মাৰ্চত আমাৰ ৰাষ্ট্ৰীয় সভাপতিয়ে বুথ সমিতিসমূহৰ এখন সভাত ভাগ ল’ব।
মুখপাত্ৰগৰাকীয়ে লগতে কয়, ‘ৰাজ্যিক বিজেপিৰ ২৬ হাজাৰ বুথ সভাপতিৰ লগতে মণ্ডল আৰু কাউঞ্চিল পৰ্য্যায়ৰ কৰ্মীসকলে এই সভাত অংশগ্ৰহণ কৰিব। এই সভাতে বিজেপিয়ে ৩,২৬,০০০ গৰাকী ‘পৃষ্ঠা প্ৰমুখ’ নিযুক্তি দিব। পিছত দলৰ বিধায়ক আৰু আন শীৰ্ষ বিষয়ববীয়া উপস্থিত থাকিবলগীয়া মূল সমিতিৰ এক সভাটো শ্বাহে অংশগ্ৰহণ কৰিব।’
অসমৰ আহি থকা পঞ্চায়ত নিৰ্বাচনৰ সৈতে শ্বাহৰ এই ভ্ৰমণৰ কোনো সম্পৰ্ক থকাৰ কথা অস্বীকাৰ কৰি গোস্বামীয়ে কয়, ‘পঞ্চায়ত নিৰ্বাচনৰ বাবে আমাৰ ৰাষ্ট্ৰীয় সভাপতি অহাৰ কি দৰকাৰ? এইটো নহয় যে পঞ্চায়ত নিৰ্বাচনক আমি গুৰুত্বসহকাৰে লোৱা নাই। সৰ্বশক্তিৰে আমি নিৰ্বাচনত নামিম আৰু আমি জিকিম বুলিও আত্মবিশ্বাসী। কিন্তু আমাৰ সভাপতিৰ এইবাৰৰ ভ্ৰমণৰ সৈতে পঞ্চায়ত নিৰ্বাচনৰ কোনো সম্পৰ্ক নাই।’
উল্লেখযোগ্য যে মিত্ৰজোঁটৰ চৰকাৰ থাকিলেও আগন্তুক পঞ্চায়ত নিৰ্বাচন বিজেপি দলে অকলেই খেলাৰ কথা।
