নাগৰিকত্ব সংশোধনী বিধেয়ক ২০১৬ৰ বিৰুদ্ধে ক্ৰমাৎ প্ৰতিবাদ তীব্ৰ হৈ অহাৰ লগে লগে অসম চৰকাৰ তথা বিজেপিৰ ভাষ্যও মন কৰিবলগীয়া হৈ পৰিছে। নাগৰিকত্ব সংশোধনী বিধেয়কৰ ক্ষেত্ৰত ৩০ জুনৰ পাছতহে চৰকাৰে মতামত প্ৰকাশ কৰিব। আনহাতে বিজেপিয়েও তেতিয়াহে নিজৰ স্থিতিৰ কথা ক’ব। এই ক্ষেত্ৰত চৰকাৰৰ স্থিতিক লৈ প্ৰশ্ন উত্থাপন হ’লেই উত্তৰ আহে— ৩০ জুনলৈ অপেক্ষা কৰক। প্ৰথমে মন্ত্ৰী ড০ হিমন্ত বিশ্ব শৰ্মাই নাগৰিকত্ব সংশোধনী বিধেয়ক সন্দৰ্ভত চৰকাৰে ৩০ জুনৰ পাছত মতামত ৰাজহুৱা কৰিব বুলি কৈছিল। তাৰ পাছত মুখ্যমন্ত্ৰী সৰ্বানন্দ সোণোৱালেও ৩০ জুনলৈ অপেক্ষা কৰিবলৈ কৈছে। জাতিধ্বংসী এই বিধেয়কৰ ক্ষেত্ৰত কিয় ৩০ জুনলৈ অপেক্ষা কৰিব লাগে? সম্প্ৰতি চৰকাৰৰ এই স্থিতিয়ে বিভিন্ন মহলত গভীৰ সন্দেহৰ জন্ম দিছে। কাৰণ ৩০ জুনত প্ৰকাশ পাব ৰাষ্ট্ৰীয় নাগৰিকপঞ্জীৰ চূড়ান্ত খচৰা। ৰাষ্ট্ৰীয় নাগৰিকপঞ্জীৰ সৈতে নাগৰিকত্ব সংশোধনী বিধেয়কৰ কি সম্পৰ্ক আছে? তাক লৈ প্ৰশ্ন কৰিছে অসমৰ ৰাইজে। নিশ্চিতভাৱে সেই প্ৰশ্ন কৰাৰ অধিকাৰ আছে ৰাজ্যৰ জনসাধাৰণৰ।
ৰাষ্ট্ৰীয় নাগৰিকপঞ্জী উন্নীতকৰণ হৈছে অসম চুক্তিৰ আধাৰত তথা উচ্চতম ন্যায়ালয়ৰ নিৰ্দেশনা তথা কঠোৰ নিৰীক্ষণত। ৰাষ্ট্ৰীয় নাগৰিকপঞ্জীত অসম চুক্তি মতে ১৯৭১চনৰ ২৫ মাৰ্চৰ পূৰ্বে অসমলৈ প্ৰব্ৰজন কৰা সকলো লোকৰে নাম অন্তৰ্ভুক্ত হ’ব। সকলো স্তৰৰ লোকৰ পূৰ্ণ সহযোগিতাত নাগৰিকপঞ্জী উন্নীতকৰণ প্ৰক্ৰিয়া চলি আছে। আনহাতে নাগৰিকত্ব সংশোধনী বিধেয়ক হৈছে আমাৰ দেশৰ সংবিধানৰ পৰিপন্থী। ধৰ্মৰ ভিত্তিত নাগৰিকত্ব প্ৰদান কৰিবলৈ বিচৰা হৈছে এই আইন সংশোধনীৰ জৰিয়তে। যাৰ কুফল ভোগ কৰিব লাগিব অসমে। সেইবাবেই অসমত ইয়াৰ বিৰুদ্ধে আৰম্ভ হৈছে শক্তিশালী গণ আন্দোলনৰ। অসমৰ ৰাইজে কোনোপধ্যেই এই নাগৰিকত্ব সংশোধনী বিধেয়ক গ্ৰহণ নকৰে। যুটীয়া সংসদীয় সমিতিয়ে অসমলৈ শুনানি গ্ৰহণ কৰিবলৈ আহোতে কেনেদৰে খিলঞ্জীয়া লোক হিলদল ভাঙি ওলাই আহিছিল তাক সকলোৱে দেখিলে। বাংলাদেশৰ হিন্দুক অসমত সংস্থাপন কৰিবলৈ মোদী চৰকাৰে কৰা গভীৰ ষড়যন্ত্ৰৰ বহিঃপ্ৰকাশ ঘটিছে এই সংশোধনী বিধেয়কৰ জৰিয়তে। হিন্দু বাংলাদেশীক নাগৰিকত্ব প্ৰদান কৰি অসমৰ খিলঞ্জীয়া জনগোষ্ঠীৰ অস্তিত্বৰ প্ৰতি ভাবুকি আনিব বিচাৰিছে বিজেপিয়ে। ইয়াৰ বিৰুদ্ধে হোৱা প্ৰতিবাদৰ ভয়ংকৰ ৰূপ দেখি এতিয়া অন্য কৌশল ৰচনা কৰিছে তেওঁলোকে।
৩০ জুনত ৰাষ্ট্ৰীয় নাগৰিকপঞ্জীৰ চূড়ান্ত খচৰা প্ৰকাশ হ’লে বহু লোকৰ নাম বাদ পৰিব বুলি নিশ্চিত হৈছে অসম চৰকাৰ তথা বিজেপি। হিন্দু লোকতকৈ মুছলমানৰ নাম অধিক বাদ পৰাৰ আশংকা কৰা হৈছে। তেতিয়াই বিজেপিয়ে আৰম্ভ কৰিব মেৰু বিভাজনৰ ৰাজনীতি। এনআৰচিত অন্তৰ্ভুক্ত নোহোৱা মুছলমানৰ সংখ্যাধিক্যক লৈ আৰম্ভ কৰিব ৰাজনীতি। সেই সুযোগৰ অপেক্ষাত আছে অসম চৰকাৰ তথা বিজেপি। এনআৰচিত নাম বাদ পৰা লোকসকলৰ হৈ মাত মাতিব কংগ্ৰেছ আৰু এআইইউডিএফে। তেতিয়াই বিজেপিয়ে এনে এক ধাৰণা দিবলৈ বিচাৰিব যে কংগ্ৰেছে বাংলাদেশৰ পৰা প্ৰব্ৰজন কৰা মুছলমান সকলৰ স্বাৰ্থৰ হৈ কথা কয়। তেওঁলোকক লৈ কংগ্ৰেছে ৰাজনীতি কৰে। এইখিনিতেই এটা দিশ মন কৰিব লাগিব যে কংগ্ৰেছে এনআৰচিত নাম বাদ পৰা সংখ্যালঘুৰ হৈ মাত মাতিবই। কাৰণ নহ’লে এআইইউডিএফে এই ক্ষেত্ৰত সুযোগ গ্ৰহণ কৰিব। কংগ্ৰেছ নেতৃত্বই সেই সুযোগ কেতিয়াও এআইইউডিএফক দিবলৈ নিবিচাৰে। তেতিয়া বিজেপিয়ে কংগ্ৰেছ সংখ্যালঘুৰ দল বুলি এক ধাৰণা দিবলৈ চেষ্টা কৰিব। ইয়াৰ জৰিয়তে মেৰু বিভাজনৰ ৰাজনীতি অধিক ত্বৰান্বিত কৰিবলৈ সাজু হৈছে বিজেপি। সাম্প্ৰদায়িক বিভাজন আনি ৰাজ্যখনত ৰাজনৈতিকভাৱে শক্তিশালী হৈ থাকিব বিচাৰিছে গেৰুৱা বাহিনীয়ে। কাৰ্যত: সেইবাবেই তেওঁলোকে অপেক্ষা কৰিছে ৩০ জুনলৈ। কিন্তু বিজেপি তথা অসম চৰকাৰৰ এই স্থিতিৰ উমান পাই সজাগ হৈ পৰিছে সকলো। কোনোপধ্যেই যাতে সাম্প্ৰদায়িক, বিভাজনকামী শক্তিয়ে অসমত অঘটন ঘটাব নোৱাৰে তাৰ বাবে সজাগ থাকিব লাগিব জনসাধাৰণ।
অহা ৩০ জুন হ’ব অসমৰ জাতীয় জীৱনৰ বাবে এক ঐতিহাসিক মুহূৰ্ত। ঐতিহাসিক অসম চুক্তিৰ আধাৰত উন্নীত কৰা নাগৰিকপঞ্জীৰ চূড়ান্ত খচৰা প্ৰকাশ পাব। আৰু সেই ঐতিহাসিক দিনটোৰ পৰাই বিজেপিয়ে আৰম্ভ কৰিব বিচাৰিব বিভাজনৰ ৰাজনীতি। সেইবাবে সকলোৱে এই কথাত সৰৱ হোৱা উচিত যে নাগৰিকপঞ্জী আৰু নাগৰিকত্ব সংশোধনী বিধেয়ক একাকাৰ কৰিব বিচৰা অসম চৰকাৰ আৰু বিজেপিৰ এই অভিসন্ধি সফল হ’বলৈ দিব নোৱাৰি। গেৰুৱা বাহিনীয়ে এই ষড়যন্ত্ৰ কাৰ্যকৰী হ’বলৈ হ’লে ভয়ংকৰ পৰিস্থিতিৰ উদ্ভৱ হ’ব ৰাজ্যত। তাৰ বিৰুদ্ধে গণতান্ত্ৰিক, ধৰ্ম নিৰপেক্ষ শিবিৰ মাৰবান্ধি থিয় হ’ব লাগিব।
(লেখক এজন জ্যেষ্ঠ সাংবাদিক)
