৩১ মাৰ্চত ৰাজ্যিক ঘাইপথ নিৰ্মাণৰ দাবীত গোৱালপাৰাত আন্দোলনৰ সিদ্ধান্ত
বিগত কেইবাবছৰ ধৰি বিধ্বস্ত হৈ থকা আৰু নিৰ্মাণৰ কাম সম্পূৰ্ণ নকৰা দুধনৈ-মাটিয়া গোৱালপাৰা পঞ্চৰত্ন ৰাজ্যিক ঘাইপথৰ ’চি’ অংশৰ নিৰ্মাণৰ দাবীত অঞ্চলটোৰ ৰাইজে আন্দোলনৰ সিদ্ধান্ত গ্ৰহণ কৰিছে।
বুধবাৰে সমাজকৰ্মী ননী দাসৰ সভাপতিত্বত অনুষ্ঠিত এখন ৰাজহুৱা সভাত সমাজকৰ্মী গোৱিন্দ নন্দী, পঞ্চানন্দ পাটক, সতীশ দে, ছোবাহান আলী, মন্নাফ আলীকে ধৰি এচাম সমাজ সচেতন লোকে বিষয়টো সম্পৰ্কত ক্ষোভ প্ৰকাশ কৰে।
সভাই চৰকাৰ তথা গড়কাপ্টানি বিভাগে গুৰুত্ব নিদিয়াৰ ফলত ৰাইজে যমৰ যাতনা ভূগিবলগীয়া বিষয়টোত চৰকাৰৰ দষ্টি আকৰ্ষণ কৰাৰ উদ্দেশ্যে আন্দোলনৰ পথ লোৱাৰ কথা ব্যক্ত কৰে।
সভাত অহা ৩১ মাৰ্চত দিনৰ ১০ বজাত ডুবাপাৰাত পথ অৱৰোধ কাৰ্যসূচী গ্ৰহণৰ সিদ্ধান্ত লোৱা হয়। এই উদ্দেশ্যে ননী দাসক সভাপতি আৰু ছোহান আলীক সম্পাদক হিচাপে লৈ দুধনৈ-মাটিয়া-গোৱালপাৰা-পঞ্চৰত্ন ৰাজ্যিক ঘাইপথ নিৰ্মাণ দাবী সমিতি এখন গঠন কৰা হয়।
উল্লেখযোগ্য যে গুৱাহাটী উচ্চ ন্যায়ালয়ত চলি থকা গোচৰ সংক্ৰান্তত প্ৰায় এবছৰে বন্ধ হৈ থকা ‘চি’ অংশৰ নিৰ্মাণ নোহোৱাৰ ফলত অঞ্চলটোৰ জনসাধাৰণ অতিষ্ঠ হৈ পৰিছে।