আপুনি কৰ দিব। কৰ দিবলৈ আপুনি আগ্ৰহী| কিন্তু কিহৰ বাবে? বিনিময়ত বিচাৰিব যি কাৰণে কৰ দিছে তাৰ সুফল। কৰ দিয়াৰ ফলত নাগৰিকে সুফল পাব লাগিব। তেতিয়াহ’লে কৰ দিবলৈ কাৰো আপত্তি নাথাকিব।
আমাৰ দেশ তথা ৰাজ্যত কথাটো এনেকুৱা নহয়। কৰৰ বোজা আমাৰ মূৰৰ ওপৰত জাপি যাব চৰকাৰে। আৰু কৰদাতাৰ ধনেৰে কৰিবলগীয়া কাম নকৰে। আৰু কৰ সংগ্ৰহৰ বাবে যোগ্য হোৱা ক্ষেত্ৰতহে কৰ সংগ্ৰহ কৰিব লাগে। এয়াই নীতিগত কথা। কিন্তু ৰহাৰ টোল গে’ট আৰম্ভ কৰি ৰাষ্ট্ৰীয় ঘাইপথ প্ৰাধিকৰণে স্বেচ্ছাচাৰিতাৰ প্ৰমাণ দেখুৱাইছে।
৩৭ নং ৰাষ্ট্ৰীয় ঘাইপথৰ ওপৰত ৰহাত বহুওৱা হৈছে টোল গে’ট। এই টোল গে’টত ৩৭নং ৰাষ্ট্ৰীয় ঘাইপথেৰে অহা-যোৱা কৰা বাহনৰ পৰা কৰ সংগ্ৰহ কৰা হৈছে। ৰহাৰ টোল গে’ট এতিয়াই আৰম্ভ নকৰিবলৈ বিভিন্ন সংগঠন আৰু ৰাইজে দাবী জনাইছিল। কিন্তু ৰাইজৰ দাবী তথা বিভিন্ন সংগঠনৰ গণতান্ত্ৰিক প্ৰতিবাদক আওকাণ কৰি ৰাষ্ট্ৰীয় ঘাইপথ প্ৰাধিকৰণে ১২ জুলাইৰ পৰা আৰম্ভ কৰিলে টোল গে’ট। এই টোল গে’ট ২০১৫ চনত আৰম্ভ কৰিব বিচাৰোঁতে কৃষক মুক্তি সংগ্ৰাম সমিতিৰ তীব্ৰ বিৰোধিতাৰ বাবে বন্ধ হৈ পৰিছিল। বৰ্তমান টোল গে’ট খৰখেদাকৈ কিয় আৰম্ভ কৰা হৈছে? ৩৭ নং ৰাষ্ট্ৰীয় ঘাইপথত টোল গে’টৰ জৰিয়তে কৰ সংগ্ৰহ কৰিব পৰা পৰ্যায় আহিছেনে? কৰ দি অহা-যোৱা কৰিবলগীয়া পথ হয়নে এইটো?
বৰ্তমান কেন্দ্ৰীয় চৰকাৰে টোল গে’টৰ জৰিয়তে ৰাজহ সংগ্ৰহ কৰি ঘাইপথ মেৰামতিত সেই পুঁজি খৰচ কৰাৰ কথা কৈছে। ঘাইপথত কৰ দি যান-বাহন চলাচল কৰিব পৰা অৱস্থা পথটোৰ লগতে সংশ্লিষ্ট অঞ্চল তথা ৰাইজৰ থাকিব লাগিব। অৰ্থাৎ কৰ দিব পৰা অৱস্থালৈ উত্তৰণ ঘটাৰ পিছতহে আৰম্ভ কৰিব পাৰি টোল গে’ট। তেন্তে অসমত সঁচাকৈয়ে ৩৭নং ৰাষ্ট্ৰীয় ঘাইপথত কৰ দিব পৰা অৱস্থা আহিছেনে? পথটোৱেদি অহা-যোৱা কৰা যিকোনো লোকেই একেষাৰে ক’ব মুঠেও সেই পৰিৱেশ অহা নাই। মেৰামতিৰ অভাৱত এক প্ৰকাৰ যাতায়াতৰ অনুপযোগী হৈ পৰিছে এই পথটো। ঠায়ে ঠায়ে পথৰ মাজত প্ৰকাণ্ড প্ৰকাণ্ড গাঁত। ৰাষ্ট্ৰীয় ঘাইপথ নে কি ধৰিবই নোৱাৰি।
বৰ্তমান চৰকাৰৰ আমোলত ঘাইপথটোৰ সামগ্ৰিক মেৰামতিৰ বাবে আজিলৈকে একো ব্যৱস্থা গ্ৰহণ কৰা নাই। মাজে মাজে কেই কিলোমিটাৰমান মেৰামতি কৰিয়েই দায়িত্ব সামৰিছে। মেৰামতি কৰা পথচোৱাৰ অৱস্থাও ভাল নহয়। কিছুদিনৰ পিছতেই চপৰাচপৰে এৰাইছে পকী পথ। এই ৰাষ্ট্ৰীয় ঘাইপথেৰে যাতায়াত এক প্ৰকাৰ দুৰ্বিষহ হৈ পৰিছে। পথটো মেৰামতিৰ বাবে ইমূৰৰ পৰা সিমূৰলৈ বিভিন্ন ঠাইত প্ৰায় প্ৰতিদিনেই প্ৰতিবাদ চলি আছে।
কেন্দ্ৰীয় পথ পৰিবহণ মন্ত্ৰী নীতিন গাডকাৰীয়ে অসমলৈ আহি শীঘ্ৰেই পথ মেৰামতি হ’ব বুলি দিয়া আশ্বাস ফুটুকাৰ ফেনত পৰিণত হ’ল। স্বয়ং কেন্দ্ৰীয় মন্ত্ৰীগৰাকীৰ নিৰ্দেশো মনা নাই ৰাষ্ট্ৰীয় ঘাইপথ প্ৰাধিকৰণে। ইয়াকে লৈ মুখ্য মন্ত্ৰী সৰ্বানন্দ সোণোৱালো ক্ষুব্ধ হৈ পৰিছে। এই পৰিস্থিতিত ৰহাৰ টোল গে’ট তেনেহ’লে কিয় আৰম্ভ কৰিছে? ইয়াৰ উদ্দেশ্য কি? কাৰোবাৰ কিবা অভিসন্ধি আছে নেকি? স্বাভাৱিকতে এইবিলাক প্ৰশ্ন উত্থাপন হৈছে ৰাইজৰ মাজত।
প্ৰতিবাদকাৰীসকলেও টোল গে’ট আৰম্ভ কৰিব পৰা পৰিস্থিতি অহা নাই বুলিহে কৈ আহিছে। বিশেষকৈ পথটোৰ সম্পূৰ্ণ মেৰামতি আৰু চাৰি লে’নযুক্ত ঘাইপথৰ কাম সম্পূৰ্ণ নোহোৱালৈকে টোল গে’ট আৰম্ভ কৰাৰ বিৰোধিতা কৰা হৈছে। প্ৰতিবাদকাৰীৰ সৈতে প্ৰশাসনৰ আলোচনাও হৈছে। কিন্তু এই সকলোবোৰ দিশ আওকাণ কৰি ৰাষ্ট্ৰীয় ঘাইপথ প্ৰাধিকৰণে আৰম্ভ কৰিলে টোল গে’ট।
টোল গে’টত কৰ দিয়াৰ লগে-লগে ব্যক্তিগত বাহনৰ গৰাকীৰপৰা আৰম্ভ কৰি বাণিজ্যিক বাহনৰ গৰাকীলৈকে সকলোৰে ওপৰত কৰৰ বোজা আহিল। এই প্ৰত্যক্ষ কৰে বিভিন্ন ক্ষেত্ৰত পৰোক্ষ প্ৰভাৱ পেলাব। বিশেষকৈ ক্ষুদ্ৰ আৰু মজলীয়া ব্যৱসায়ীৰ ওপৰত নেতিবাচক প্ৰভাৱ পৰিব।
আন্তঃগাঁথনিৰ ক্ষেত্ৰত অতি দুৰ্বল অসমত ৰাষ্ট্ৰীয় ঘাইপথত যাতায়াতৰ বাবে কৰ দিবলগীয়া হোৱাটো দুৰ্ভাগ্যজনক। বাট-পথ উন্নত হোৱাৰ লগতে ৰাজ্যখনৰ আন আন দিশবোৰো সুচল হোৱাহেঁতেন হয়টো ৰহাৰ টোল গে’টৰ বিৰোধিতা নকৰিলেহেঁতেন। কিন্তু বৰ্তমান পৰিস্থিতিত কোনো পধ্যেই কৰ দি ৩৭নং ৰাষ্ট্ৰীয় ঘাইপথত যাতায়াত কৰিবলগীয়া পৰ্যায় অহা নাই। অৰ্থাৎ কৰ সংগ্ৰহ কৰিব পৰাকৈ ৰাইজক সুবিধা দিব পৰা নাই চৰকাৰে। কেৱল কৰ সংগ্ৰহ কৰিলেই নহ’ব, তাৰ বিনিময়ত পাবলগীয়া সুবিধাও ৰাইজে পাব লাগিব। এয়াই প্ৰাথমিক চৰ্ত। কিন্তু তাক আওকাণ কৰি ৰাষ্ট্ৰীয় ঘাইপথ প্ৰাধিকৰণ তথা কেন্দ্ৰীয় চৰকাৰে স্বেচ্ছাচাৰিতাৰ প্ৰমাণ দিছে।
এই ক্ষেত্ৰত অসম চৰকাৰৰ ভূমিকা গুৰুত্বপূৰ্ণ। আমি ভাবোঁ- মুখ্য মন্ত্ৰী সৰ্বানন্দ সোণোৱালে বিষয়টোত হস্তক্ষেপ কৰিব লাগে। টোল গে’টক লৈ ৰাইজৰ মাজত কি প্ৰতিক্ৰিয়াৰ সৃষ্টি হৈছে তাক উপলব্ধি কৰিব লাগিব মুখ্য মন্ত্ৰী সোণোৱালে। কাৰণ ৰাজ্যৰ বিধ্বস্ত বাট-পথে সোণোৱাল চৰকাৰৰ ব্যৰ্থতাক প্ৰতীয়মান কৰিছে। এই ব্যৰ্থতাৰ মাজতেই ভূতৰ ওপৰত দানহ পৰাদি আহিছে ৰহাৰ টোল গে’ট।
এক কথাত ক’বলৈ গ’লে বৰ্তমান পৰিস্থিতিত অনতিপলমে বন্ধ কৰক এইখন টোল গে’ট। অন্যথা টোল গে’টৰ কৰক লৈ আৰু অধিক প্ৰতিবাদ হ’ব। আৰু জনৰোষৰ বলি হ’ব লাগিব চৰকাৰ।
ইয়াৰ লগতে ৰহাৰ টোল গে’টৰ কৰৰ হাৰো যথেষ্ট বেছি হোৱা পৰিলক্ষিত হৈছে। ভাৰতৰ আন ঠাইৰ তুলনাত নালাগে, মেঘালয়ৰ তুলনাতো ৰহাত কৰ বেছি হৈছে।
মোদী চৰকাৰে অটল বিহাৰী বাজপেয়ীৰ সপোনৰ বাট-পথ বাস্তৱত নিৰ্মাণ কৰক। বিজেপিৰ পিতামহ বাজপেয়ীয়ে বিধ্বস্ত ঘাইপথত কৰৰ বোজা জাপি দিবলৈ কোৱা নাছিল।
(লেখক গুৱাহাটীস্থিত এজন জ্যেষ্ঠ সাংবাদিক। ই মে’ইল : [email protected])
