ৰাজ্যত পুনৰ মৃত্যু দুটা বনৰীয়া হাতীৰ

এটা কৰুণ ঘটনাত আজি  ৰাতিপুৱা ভাগত নগাওঁ জিলাৰ চামগুৰিৰ গেন্ধালী কছাৰী গাওঁত  বিদ্যুতৰ তাঁৰত লাগি দুটাকৈ হাতীৰ মৃত্যু হয়। খাদ্যৰ সন্ধানত লোকালয়লৈ ওলাই অহা হাতী দুটা উচ্চ ক্ষমতা সম্পন্ন বিদ্যুতৰ তাঁৰত লাগি ধৰাত  শুৰ আৰু মূৰৰ অধিকাংশই অগ্নিদগ্ধ হয়। ফলত  হাতী দুটাৰ থিতাতে মৃত্যু হয়। দুটাকৈ হাতীৰ এই কৰুণ মৃত্যুক সহজভাৱে ল’ব পৰা নাই স্থানীয় ৰাইজ তথা প্ৰকৃতিপ্ৰেমী সকলে। সকলোৱে একমুখে বিদ্যুতবিভাগৰ অকৰ্মণ্যতাক গৰিহণা দিছে। লক্ষ্যণীয় যে হাতেৰে চুব পৰা অৱস্থাত ওলমি থকা উচ্চ ক্ষমতা সম্পন্ন বিদ্যুতৰ তাঁৰ কেইদালৰ সু-ব্যৱস্থা কৰি দিবলৈ বাৰম্বাৰ দোহাৰি থকাৰ পিছতো বিদ্যুত বিভাগে একো ব্যৱস্থা নোলোৱাৰ অভিযোগ উত্থাপন কৰিছে স্থানীয় লোকে।

উল্লেখযোগ্য যে যোৱা কিছু দিনৰ পৰা ৰাজ্যখনৰ বিভিন্ন ঠাইত নিয়মীয়াকৈ বনৰীয়া হাতীৰ মৃত্যু হৈ আহিছে। হাতী-মানুহৰ সংঘাতত ক’ৰবাত যদি হাতীৰ মৃত্যু হৈছে, ক’ৰবাত মানুহৰ। কিন্তু এই লৈ যেন বন বিভাগৰ কোনো চিন্তাই নাই। বন বিভাগে হাতীৰ অৱস্থান আৰু গতিবিধিক নিৰীক্ষণত ৰখাৰ কোনো চেষ্টা কৰা নাই। যাৰ বাবে ৰে’লৰ খুন্দাতেই হওক বা বিদ্যুত বিভাগৰ গাফিলতিৰ বাবেই হওক কেইবাটাও হাতীৰ মৃত্যু হৈছে যোৱ এমাহৰ ভিতৰতে। আনহাতে অবৈধ ভাবে বনাঞ্চল বেদখলৰ ফলত  বনৰীয়া হাতীৰ বাবে খাদ্য ক্ৰমাৎ কমি অহাত হাতীৰ পাল খাদ্য বিচাৰি জনাঞ্চলত প্ৰৱেশ কৰাটো এটা স্বাভাৱিক ঘটনাত পৰিণত হৈছে।