ৰাজ্যৰ ক্ৰীড়াবিদ আৰু ক্ৰীড়াপ্ৰেমীক উৎসাহিত কৰিছে মুখ্য মন্ত্ৰীৰ আকৰ্ষণীয় ঘোষণাই
ৰাজ্যৰ ক্ৰীড়াবিদসকলক উৎসাহিত কৰাৰ পদক্ষেপ হিচাপে মুখ্য মন্ত্ৰী সৰ্বানন্দ সোণোৱালে অলিম্পিক আৰু এছিয়ান গেইমছত পদক জিকা ৰাজ্যৰ খেলুৱৈলৈ আকৰ্ষণীয় পুৰস্কাৰ আগ বঢ়োৱাৰ কথা ঘোষণা কৰাৰ পিছত উৎফুল্ল হৈছে ৰাজ্যৰ ক্ৰীড়াবিদসকল।
উল্লেখযোগ্য যে ৩১ মাৰ্চত নলবাৰীত এই দুই বৃহৎ প্ৰতিযোগিতাত কোনো খেলুৱৈয়ে পদক জিকিলে ১ কোটি ৫০ লাখ টকাৰ পুৰস্কাৰ দিয়াৰ লগতে প্ৰশাসনিক বিষয়াৰ চাকৰিও যচা হ’ব বুলি সদৰী কৰিছিল মুখ্য মন্ত্ৰীজনে। পদক বিজয়ীসকলক প্ৰশাসনিক বিষয়াৰ লগতে পৰিদৰ্শক পৰ্য্যায়ৰ পদতো নিযুক্তি দিয়া হ’ব বুলি সোণোৱালে ঘোষণা কৰিছিল।
উল্লেখযোগ্য যে ৰাজ্যত বহুতো কৃতী খেলুৱৈয়ে উপযুক্ত চৰকাৰী সমৰ্থন নোপোৱাৰ ফলত সফল খেলুৱৈ জীৱন থকাৰ পিছতো সাধাৰণ জীৱন যাপনৰ সংগ্ৰামত লিপ্ত হ’ব লগীয়া হয়। বৰ্তমান খেলুৱৈ জীৱন সামৰা ৰাজ্যৰ বহুকেইগৰাকী সফল আৰ্চাৰী খেলুৱৈ, কাৰাটে, টাইকোৱাণ্ডো খেলুৱৈয়ে কঠোৰ সংগ্ৰাম কৰি জীৱন নিৰ্বাহ কৰি থকা বুলি জনা যায়। স্বাভাৱিকতে মুখ্য মন্ত্ৰীৰ এই ঘোষণাই এই কৰুণ ছবিখনৰ ৰং সলনি কৰিব বুলি আশা কৰিছে ৰাজ্যৰ ক্ৰীড়াবিদ তথা ক্ৰীড়াপ্ৰেমীসকলে।
প্ৰসংগক্ৰমে উল্লেখ কৰিব পাৰি যে বুলি বসুমতাৰী নামৰ এগৰাকী কৃতী খেলুৱৈয়ে (যি ৰাষ্ট্ৰীয় প্ৰতিযোগিতাত আৰ্চাৰীত সোণৰ পদক লাভ কৰিছিল) পথৰ কাষত কমলা বিক্ৰী কৰি জীৱন নিৰ্বাহ কৰিব লগা হোৱা খবৰ অসমৰ সংবাদ মাধ্যমত প্ৰচাৰ হোৱাৰ পিছত চৰকাৰে তেওঁক সংস্থাপন দিছিল।
তেওঁক চৰকাৰে আৰ্চাৰী প্ৰশিক্ষক হিচাপে নিযুক্তি দিয়ে। বুলি বসুমতাৰীৰ দৰে ৰাজ্যৰ আন ভালেমান কৃতী খেলুৱৈয়ে চৰকাৰৰ উপযুক্ত মনোযোগৰ পৰা বঞ্চিত হৈ আছে।