ৰাজ্যৰ প্ৰথমটো বানত প্লাৱিত বোকাখাত : কাৰ্বি পাহাৰৰ পৰা নামি অহা পানীয়ে বুৰাই পেলালে বিস্তীৰ্ণ অঞ্চল

ৰাজ্যৰ প্ৰথমটো বানত প্লাৱিত হ’ল বোকাখাত। এটা নিশা হোৱা নেৰা নেপেৰা বৰষুণৰ ফলতেই ডিফলু নদীৰ ধলে বুৰাই পেলাইছে বোকাখাতৰ বিস্তীৰ্ণ অঞ্চল৷ কাৰ্বি পাহাৰৰ পৰা ডিফলু নদীৰে নামি অহা ধলে বোকাখাতৰ লতাবাৰীৰ বিভিন্ন অঞ্চলৰ লগতে প্লাৱিত কৰিছে ৩৭ নং ৰাষ্ট্ৰীয় পথ।

লতাবাৰীত ৩৭ নং ৰাষ্ট্ৰীয় পথৰ প্ৰায় ৭০০ মিটাৰ ওপৰেদি তীব্ৰ বেগত পাৰ হৈছে পানী৷ এই বাঢ়নি পানীৰ ফলত স্তব্ধ হৈ পৰিছে উজনি-নামনিৰ যাতায়ত ব্যৱস্থা৷

ইফালে কাৰ্বি পাহাৰৰ পৰা নামি অহা ধলে শিলজুৰি ,কাকজুৰি,পানবাৰী আদি স্থানত পথাৰৰ পকা ধানো বুৰাই পেলোৱা বুলি জানিব পৰা গৈছে ৷ অঞ্চলটোত ধলৰ লগত নামি অহা শিল-বালি আৰু মাটিয়ে পুতি পেলাইছে বিস্তীৰ্ণ অঞ্চল৷

বোকাখাতৰ মহকুমা প্ৰশাসনে আৰক্ষী আৰু এছ ডি আৰ এফৰ সহযোগত ইতিমধ্যে উদ্ধাৰ অভিযান আৰম্ভ কৰা বুলি জানিব পৰা গৈছে৷ এই বৰ্ষৰ প্ৰথমটো বানে বিধ্বস্ত কৰা বোকাখাতৰ স্থানীয় লোকে ডিফলু নদীৰ এনে ৰূপ আগতে কেতিয়াও দেখা নাই বুলি মন্তব্য কৰে।

উল্লেখ্য যে কাৰ্বি পাহাৰত চলি থকা অবৈধ আৰু অপৰিকল্পিত অবাধ শিল খননৰ ফলতেই এনেধৰণৰ ভয়ঙ্কৰ পৰিস্থিতিৰ উদ্ভৱ হোৱা বুলি স্থানীয় ৰাইজে মন্তব্য কৰিছে৷

আনহাতে ডিফলুৰ উপৰি কাৰ্বি পাহাৰৰ পৰা নামি অহা কহঁৰা নদীৰ ধলেও কাজিৰঙাৰ বিস্তীৰ্ণ অঞ্চল প্লাৱিত কৰিছে ৷ যাৰ ফলত এতিয়া কাজিৰঙাৰ বন্যপ্ৰাণী সমূহলৈ অশানি সংকেত নামি আহিছে।